İyun 1 künü “Yıldız” mecmuası idaresinde Eşref Şemyi-zade adına edebiyat mukâfatı boyunca komissiyanıñ 2010 senesi içün konkurs ğalibini belgilev maqsadınen yekünlev toplşauvı keçirildi. Eski-Qırımlı belli metsenat Ebazer Emiraciyevniñ “Can yürekten” fondı tarafından tesis etilgen Eşref Şemyi-zade adına edebiyat mukâfatı bu yıl üçünci kere taqdim etilmekte. Bu nufuzlı mukâfatnen 2009 senesi “Devir aralıqlarında” kitabı içün merhum yazıcımız Safter Nagayev, 2010 senesi ise “Qalem ucından” kitabı içün yazıcı Riza Fazıl taqdirlengen ediler.
Bu sefer komissiyağa tüşken materiallardan konkursqa üç nominant seçilgen edi: 1. Zakir Qurtnezir. “Babaçığım, Sizni qaydan tapayım?!”. 2. Ayşe Kokiyeva. “Qırımtatar ve çet el edebiyatı”. 3. Aci Server Bekir. “Kâbe yolu”. Şiirler cıyıntığı.
Komissiya azaları: Riza Fazıl (reis), Dilâver Osman (kâtip), Uriye Edemova, İbraim Çegertma, Seyran Suleyman, Aydın Şemyi-zade (mayıs ayında Aqmescitte bulunğanda öz fikirlerini yazıp qaldırğan edi), Ebazer Emiraciyev (mukâfat tesisçisi) konkursqa keçken eserlerni muzakere eterek, gizli rey berüv vastasınen çoqluq ile Ayşe Kokiyevanıñ “Qırımtatar ve çetel edebiyatı” kitabını konkursnıñ ğalibi dep tanıdılar. Bu sayede nominantnıñ bir sıra derslikler ile qırımtatar edebiyatına qoşqan ğayet salmaqlı issesi de esapqa alındı.
Mukâfat büyük şairimiz Eşref Şemyi-zadeniñ doğğan kününe qararlaştırılıp, iyun 23-de Qırımtatar akademik teatrinde tantanalı sürette taqdim etilecek. Merasimge er kes davet etile. Kiriş bedava. Aqşam saat 18-de başlanacaq.
Mukâfat boyunca komissiya