Fidançıqta meraqlı körüşüv

11.05.20160:19

İyunniñ 7-de "Fidançıq" balalar inkişaf ve oqutuv merkezinde "Közaydın" informatsion-merkeziniñ ve küçükler içün İlimler akademiyasınıñ "MANünâ" togereginiñ rehberi Zarema Hayredinova, onıñ talebeleri Amal, İbraim Abduramanov, Velide Mamutova ve "Yañı dünya" gazetasınıñ muarriri Zera Bekirova talebelernen körüşti.

Körüşüvde "Fidançıq"nıñ talebeleri yıl devamında "Şeñ elifbeden" ögrengen şiirlerini ifadeli oqudılar ve bu mültimedia oqutuv programmanıñ müellifi Zarema Hayredinovağa öz teşekkürlerini bildirdiler.

Zera Bekirova "Yañı dünya" gazetasına ilâve olaraq yayınlanğan "Balalar dünyası" gazetasını balalarğa bir kere daa taqdim etip, onıñ saifelerinde balalarnıñ yaşayışından meraqlı levhalar neşir etilgenini ve yıl devamında "Fidançıq"ta olıp keçken meraqlı tedbirler aqqında yazılğanını qayd etti.

"Fidançıq"ta küçükler içün İlimler akademiyasınıñ "MANünâ" togeregine qatnağan İbraim Abduramanovnıñ "Bayraq" mülfilmi ve Velide Mamutovanıñ "Balalar yaşasın" mülfilimniñ premyerası olup keçti. İçtimaiy ağlarda bu mülfilimlerni körgen Zafer Qaratay böyle eycanlı satırlar yazdı: "Bayraq –qısqa film. Taraq tamğalı kök bayrağımıznıñ ikâyesi. Filmniñ müellifi İbraim Abduramanov – sadece 10 yaşında, onıñ tatlı qardaşı Meryem 3 yaşında olup, filmni seslendirgen. İlmiy rehberleri Zarema Hayredinova – sessiz, sakin, amma inanılmaz işler yapqan fedakâr bir vatansever. Bu pek yahşı dokumental filmni yapqan meslekdaşlarıma hoş keldiñiz dep aytam. Allah yoluñıznı açıq etsin!". Zafer beyniñ mülfilimlerge kesken yüksek qıymetine qoşulmamaq mümkün degil.

Şunı qayd etmelimiz ki, bu körüş master-klass şekilinde keçirildi. Zarema oca ve talebeleri ""Fidançıq"nıñ balalarınen beraber Nuzet Ümerovnıñ "Dostum" şirine mülfilim yaptılar. Bu faaliyet talebelerge em ana tilimizni em de informatsion tehnologiyalarını ögrenmege imkân bere. Ümüt etemez ki, küçükler içün İlimler akademiyasında "MANünâ" togereginde qırımtatar tilinde de gruppa açılır ve daa çoq faydalı oqutuv filmler dünya yüzüni körer.

Sağ oluñız ocalar, sağ oluñız balalar!!!!

Enise ABİBULLAYEVA