Qırım Yuqarı mahkemesi «Hizb ut Tahrir» işi boyunca keçken Bağçasaraydan dört qırımtatarnı apiste qaldırdı.
Bu aqta adliyeci Emil Kürbedinov haber etti.
«Qırım Yuqarı mahkemesinde terrorizmde qabaatlanğan Bağçasaraydan dört qırımtatar mabüsiniñ apis etilmesinen bağlı adliyecilerniñ şikâyeti baquvı üzerinde toplaşuv soñuna keldi. Mahkeme, adet üzre, qorçalaycılarnıñ delillerini qabul etmedi ve dörtüni de apiste qaldırdı», – dep yazdı o Facebook saifesinde.
Adliyeciniñ malümatına binaen, mahkeme toplaşuvı videokonferentsiya tarzında keçirildi.
Avdet haber etkeni kibi, mezkür iş boyunca mahkeme toplaşuvı İyül 21 künü keçirilmek kerek edi, lâkin Aqmescit SİZOsı minalanğanı aqqında haber çıqqanı sebebinden toplaşuv avuştırıldı.
Hatırlatamız, mayıs 12 künü, Bağçasarayda silâlı küçler tarafından bir sıra qırımtatarlarınıñ evinde ve «Salaçıq» qavehanesinde tintüvler ötkerildi. Neticede, Zevri Abseitov, Remzi Memetov, Rustem Abeltarov ve Enver Mamutovnı apis ettiler. Olarnıñ episini Rusiyede yasaq olunğan «Hizb ut-Tahrir» teşkilâtınen işbirlikte şekleyler.
