Bağçasarayda keçirilgen festival musafirleri merasimden zevq aldı

07.10.201623:00

Oktâbr 7-de Bağçasaray Han sarayındaki müzeyniñ yüz yıllığı yaqınlaşması çerçivesinde saray meydanında «Ustanıñ altın elleri» festivali keçirildi.

Merasim Derviza küz bayramına bağışlandı.

Saat 10.00-da açılğan sergide qırımtatar ressamları, keramika, toqumacılıq, nağış, quyumcılıq ve diger milliy sanat çeşitleri ustalarınıñ işleri taqdim etildi.

Saat 13.30-da, cuma namazından soñ, kontsert programması başlandı.

«Bu kontsertte, diger alışqanımız merasimlerge köre, belli artistler degil de, hususan yaş, amma aynı istidatlı icracılar iştirak etti. Olarnıñ icra etüvlerinden közde yaşlar peyda oldı. Bu merasimniñ Qırım yüreginde, dağlar arasında keçirilgeni ayrı duyğular peyda etti. Etrafqa baqıp, bu nağmelerni diñlep, zevq alasıñ: Vatan!», — dep añlattı Avdetke merasim iştirakçilerinden biri.

Yaş icracılardan ğayrı, kontsert programmasında belli qırımtatar artsitleri Uryane Kenjikayeva, bard Asan Faytoncı iştirak ettiler. Yazıcı Elvira Emir-Ali Kapnist öz «Selsebil» destanını taqdim etti.

Merasim iştirakçileri teşkilâtçılardan biri olğan Edem Faytoncığa onıñ Facebook saifesinde teşekkür bildirdi.

Bundan da ğayrı, yarmalıq-sergide kelişikli fiyatlarnen dekorativ-ameliy sanat eşyalarını satın almaq mümkün edi — nağışlanğan şeylerden başlap, yaş ressamlarnı resimlerine qadar.

Halq, bir-birini deñiştirip, kele ve kete edi, çünki programma büyük edi ve aqşamğa qadar devam etti.

Фото аватара

Автор: Редакция Avdet

Редакция AVDET