PACE rezolütsiyasında Qırımda qırımtatarlarnıñ aqları saqlanmaq kerek olğanı qayd etile

13.10.201613:55

Avropa Şurası Parlament assambleyası sentâbr 18-de Qırımda keçirilgen Rusiye Devlet Dumasına saylavlarnı takbih etti.

Oktâbr 12-de bu mesele boyunca PACE rezolütsiyası qabul etildi, vesiqada qayd etile ki, işbu saylavlarnıñ keçirilmesi halqara uquqnı boza ve saylanılğan Dumanıñ qanuniyetini şübeli yapa.

Bunen beraber, rezolütsiyağa ukrain eyyeti tarafından teklif etilgen Avropa Şurası devletlerine Rusiyeden sanktsiyalarnı, Donetsk ve Lugansk bazı vilâyetleri ve Qırımnıñ Ukraina nezaretine qaytarılacağına qadar lâğu etmemek tevsiyesinen tüzetme kirsetildi.

Bundan da ğayrı, çarşenbe künü PACE Qırımda, Donetsk ve Lugansk halq cumhuriyetlerinde insan aqları saqlanuvına bağışlanğan qararnı qabul etti. İşbu topraqlarda insan aqları saqlanuvı içün, rezolütsiyada aytılğanı kibi, «olarnı aqiqaten nezaret astında tutqan» devlet olaraq, Rusiye mesüliyetlidir, dep bildire «Qırım.Aqiqat».

Qırımtatarlarnıñ aqları ve serbestligi saqlanuvı aqqında ayrıca qayd etile.

Автор: Редакция Avdet

Редакция AVDET