Aksönov «fleşmob» sözüni yasaq etti

24.10.20169:00

Qırım yolbaşçısı Sergey Aksönov ecnebiy sözlerden vazgeçmege davet etti.

Laf, belediyeler ile videoselektor çerçivesinde keçirilgen muzakerelerde yürsetildi.

Böyleliknen, Qırım yolbaşçısı ve cumhuriyet nazir muavini Dmitriy Polonskiy «fleşmob» sözü yerine «halq eglenceleri» ibaresini qullanmağa añlaştılar.

Memurlar arasında subet noyabr 4-te Qırımda keçirilecek Halq birligi kününe bağışlanğan merasimler meselesi baqılğanda oldı.

Polonskiy merasimler keçirilmesi ve teşkil etilmesi tertibini ilân etti.

«Esas merasimler Aqmescitte keçirilecek: bizde yürüş, miting, Rusiye halqları horovodı (tögerek oyunı) fleşmobı ve ilâhre olacaq», – dep ayttı baş nazir muavini.

Amma Sergey Aksönov onıñ lafını bölip, ecnebiy tilden alınğan sözlerni qullanmamağa çağırdı.

«Dmitriy Anatolyeviç, ital yerine başqasını qoymaq. «Fleşmob» sözüni qamustan yoq etmek kerek», – dedi o.

«Halq eglencesi!» – birden cevap tapqan Polonskiy.

«Menim lafımda da parazit sözleri bar, amma bunı endi toqtatmaq kerektir», – dep ayttı Aksönov.

«Halq eglencesini – horovodnı – keçirecekmiz», – dep lafnıñ neticesini seslendirdi nazir muavini.

Halq birligi kününe bağışlanğan merasimler noyabr 4-te Qırımnıñ bütün belediyelerinde keçirilecek, dep bildire «Krıminform».

Belli olğanı kibi, Qırımda ecnebiy sözlerge qarşı parlament spikeri Vladimir Konstantinov çıqqan. Bundan evel o, ecnebiy sözlerni ağızğa alınmaz sözler olğanını tanımağa çağırğan.

Фото аватара

Автор: Редакция Avdet

Редакция AVDET