Kiyevde TMU Qırım ve Aqyardan er talebeni qabul etecek

27.10.201614:55

Qırım ve Aqyarnıñ er angi aliy oquv yurtunıñ talebesi istegen vaqıtta Kiyevde yañıdan işini devam etken V.İ. Vernadskiy adına Tavriya milliy universitetine keçe bile.

Bu aqta TMU rektorınıñ vazifesini eda etken Vladimir Kazarin bildirdi.

Onıñ qayd etkenine köre, universitetke er angi Qırım ve Aqyar talebesi, istegen vaqıtta ve istegen ihtisas boyunca keçirile bile, dep haber ete «Qırım.Aqiqat».

«Balalar tüşüne ki, eger qabul etüv komissiyası işini sentâbr 20-de bitirgen olsa, demek ki, başqa iş de toqtatıldı. İçtimaiy ağlar vastasınen haber ettik ki, bu, universitetke keçmege istegenlernen bağlı degil. Qayd etmek isteyim ki, Qırım ve Aqyarnıñ er angi aliy oquv yurtlarından, er angi ihtisas aliy oquv yurtlarından keçirilmek mümkün. Biz, ya talebeni qabul etmek içün bizde yaqın bir ihtisas taparmız, ya da diger bir aliy oquv yurtu ile ortaq olaraq bağ tutarmız, bu insan bu aliy oquv yurtuna kirsin dep. Oqumağa, isteklerini ömürge keçirmege istegenlerge yardım etmek içün yol taparmız», – dep qayd etti Kazarin.

Sentâbr 26-da Kiyevde Ukrainanıñ qıtaiy qısmına keçken V.İ. Vernadskiy adına Tavriya milliy universitetiniñ tantanalı açılış merasimi keçirildi.

Фото аватара

Автор: Редакция Avdet

Редакция AVDET