Qırımtatar müzeyiniñ tesisçisi ilân etti ki, 16 yıldan soñ Bağçasaray «Qırım Cenevresi» olacaqtır

28.10.20169:40

Qırım tarihiy müzey-qoruğınıñ tesisçisi Guliver Altın 16 yıl içinde Qırım hanlığınıñ paytahtı Bağçasaraynı «Qırım Cenevresine» – devletlerara, dinlerara ve milletlerara munasebetlerniñ eyileşmesi boyunca tanılğan halqara meydançıqqa – çevirecek ola.

Bu aqta o, Facebook saifesinde bildirdi.

Onıñ sözlerine köre, 2032 senesi, şeerniñ 500 yıllığı qayd etilecekte, Bağçasaray bütünley tamir etilmek, diniy, medeniy ve tasil merkezine çevirilmek kerek.

Bunen beraber, Altın qayd etti ki, şeerde 2,5 yıl devamında beşinci memuriyet yolbaşçısı deñişti, o «öz faaliyetini tarihiy müitni bozmaqtan ve Bağçasaraylılarğa ürmetsizlikten başladı».

«Bellesem, böyle faaliyet çoq devam etmez, amma bu, şeer inkişafı içün, abadanlaştırılğan şeerde yaşamaq aqqı içün şeer sakinleriniñ areketi peyda olmasına sebep ola bile», – dep belley o.

Bundan evel Guliver Altın Bağçasaray tarihiy asabalığını saqlav boyunca «Bağçasaraynı saqlayıq» kampaniyası teşkil etilmesiniñ teşebbüsçisi oldı. O, cemaat erbaplarını ve mühbirlerni işbu aktsiyağa qoltutmağa çağırdı.

Bu künleri aktisya çerçivesinde yol işleri ve Bağçasaraynıñ tarihiy qısmınıñ saqlanması meseleleri muzakere etildi.

Muzakerelerde Qırım Cumhuriyeti medeniy asabalığı saqlav boyunca Devlet Komiteti, Bağçasaray memuriyeti yolbaşçıları, şeer müzeyleri ve cemaatçılığı temsilcileri iştirak etti.

Altınnıñ sözlerine binaen, «medeniy asabalıq saqlavı organları tarafından mürekkep subetten» soñ şeer memuriyeti temsilcilerine Lenin soqağı, 97 adresi boyunca tarihiy-mimarcılıq ekspertizanı keçirmege tevsiye etildi.sohranim-bahchisaraj1

«Yazıq ki, Aleksandr Trânov, aynı bu kün Yaltada sözde bulunğan ve Qırım medeniy asabalığı saqlavınıñ ve cemaatçılıqnıñ devlet parası qullanmasını nezaret etüvde iştiraginiñ müimligi aqqında aytqan Rusiye Federatsiyası prezidenti Vladimir Putinniñ noqta-i nazarını bilmey», – dep yazdı müzey tesisçisi Facebook saifesinde.

Onıñ hatırlatqanına binaen, Rusiye prezidenti Bağçasaray yolunıñ tamir etilmesine ve Lenin soqağında yerleşken binalarnıñ yañıdan tamirlenüvine 300 million ruble ayırdı.sohranim-bahchisaraj

Avdetniñ bundan evel bildirgenine köre, Bağçasarayda Lenin soqağı, 97 adresi boyunca yerleşken XVII asırğa ait qadimiy binanı yoq etmege başladılar. Şeer akimiyeti, binanıñ medeniyet asabalığı obyekti olaraq tanılması meselesi boyunca toplaşuvnı beklemedi.

Фото аватара

Автор: Редакция Avdet

Редакция AVDET