Kiyevde «Mustafa» filmi taqdim etildi

29.10.201610:20

Oktâbr 28-de ukrain paytahtında belli uquq qoruyıcı ve dissident Mustafa Cemilevniñ ayatı aqqında «Mustafa» vesiqalı filmi taqdim etildi.

Film, «Molodost» («Yaşlıq») Kiyev halqara kinofestivaliniñ «Ukrain premyeraları» programmasında taqdim etilgen.

«Mustafa» filminiñ ğayesiniñ saipleri, mühbir Olga Morkovaya ve QırımSOS idarecisi Tamila Taşeva ola. Ahmed Sarıhalil film rejissörı ola.

Film yapılması işleri 2015 senesi fevral ayında başlandı ve bir yarım yıl devam etti. Evel leyha taqımı tolu vesiqalı filmni yapmağa tüşüngenine baqmadan, iş yapılğan vaqıtta onıñ şekli biraz deñişti. Mustafa Cemilevniñ kerçek ayatından 5 sanalaştırma seyircini o zamannıñ müitine daldıra.

«Mustafa Cemilevniñ ömründen esas vaqialar aqqında añlatmağa qarar aldıq: sürgünlik, onıñ birinci apiske qapatılması, açlıq. Tahminen bu yol boyunca areket ettik. Vahtang Kapiani, buña esaslanıp, film qaramanlarından intervyu alğan edi. Mustafa ağanıñ ömrü aqqında ikâye etkenini temel olaraq aldıq. Buña onen şahsen körüşkenlerniñ, yani dissidentler, uquq qoruyıcılarnıñ hatıralarını qoştıq. İntervyu büyük olğan, bunıñ içinde çoq meraqlı şey aytıldı. Kerekli söz saylap almağa ağır edi, bunıñ içün, yazıq ki, montaj yapılğanda çoq şeyni kesmek kerek oldı. Film, kadr artındaki sessiz oldı, bunıñ içün tarihnı qaramanlar añlatmaq kerek edi», – dep añlattı film rejissörı Ahmed Sarıhalil.


Mustafa — Trailer from Mustafa_Doc on Vimeo.

Фото аватара

Автор: Редакция Avdet

Редакция AVDET