Sankt-Peterburgda er sene keçirilgen Nefretke qarşı yürüşte eki aktsiya iştirakçisi yaqalandı.
Yaqalanğan kişilerniñ biri Ukraina bayrağını, digeri ise, qırımtatar bayrağını tutqan edi. Levhalarnıñ birinde «Ukrainağa qarşı nefret cinayetleri» sırasında qırımtatarlarğa ve Ukraina tarafını tutqan faallerge qarşı repressiyalar qayd etile.
«Bu, bizim qabaatımız ve bizim milliy ayıbımızdır!» – dep yaza leyhanıñ müellifi.
Yürüş Vasilyev adası aqrebinde başlandı, iştirakçiler – tahminen yüz adam – Saharov meydanına keçti, bu yerde Rusiyeniñ Ukrainağa nisbeten siyasetini muzakere etti ve merasimniñ manası aqqında hatırlattı. Bu an eki kişi yaqalandı.
Bundan evel uquq qoruyıcılar toplaşqan insanlarğa haber etti ki, yürüşniñ keçirilmesine razılıq berildi, amma bayraq ve şiarşız, dep bildire Fontanka.ru. Böyleliknen, yürüş uyğunlaştırılmağan serbest «kezintiler» şeklinde keçirildi, çünki şeer memurları, keçken sene kibi, merasimni keçirmekni red etti.
Nefretke qarşı yürüş — er sene Sankt-Peterburgda keçirilgen yürüştir, merasim dayanuvsızlıq, ksenofobiya ve cınıs, ırq, millet, teri renki, til, tamır, mal-mülk ve vazife, içtimaiy mensüplik, yaşağan yer, din mensüpligi, fikir, cemaat teşkilâtlarında iştirak etüv ayırımlarına qarşılıq kösterüvine bağışlanğan.
Aktsiya 2004 senesinden başlap, nefret cinayetleri boyunca mahkemelerde ekspert olaraq iştirak etken, neomilliyetçiler tarafından öldürilgen alim-antropolog ve uquq qoruyıcı Nikolay Mihayloviç Girenkonıñ hatırasına ve onıñ doğğan kününe (oktâbr 31) bağışlanıp, keçirile.
Yaqalav kadrlarını 10-cı daqqadan seyir etiñiz.
