Rosselhoznadzor Qırım idaresiniñ hadimleri Yaltadaki Kiyevskaya soqağında yerleşken sebze bazarını teşkerdi.
Müessiseniñ matbuat hızmeti teşkerüv neticelerini bildirdi.
Bir qaç ticariy noqtada, mahsulat anbarında, bunen beraber, «Starıy Amsterdam» tükânında İngiltere, Felemenk, Poloniya, Almaniya, Frenkistan, Ukraina, İtaliyada yapılğan qaşqaval tapıldı. Qaşqavalnıñ umumiy ağırlığı 48 kilogrammnı teşkil etti. Bunen beraber, 40 kilo ukrain sucuğı tapıldı.
İş adamları veterinar şeadetnamelerini taqdim etip olamadı, bundan da ğayrı, rus tilinde vesiqalar ve mahsulatta işaretler yoq edi, dep qayd ettiler müessisede.
Sucuq ve qaşqaval alındı ve «Brener 500» furun-insinerator içinde yaqıldı.
