Ervin İbragimovnıñ qaçırılması meselesi Birleşken Milletler Teşkilâtınıñ İnsan aqları Şurasınıñ iş gruppası sessiyasında baqılacaq

08.11.201610:30

Birleşken Milletler Teşkilâtınıñ İnsan aqları Şurasınıñ zorbalıq ya da isteksiz ğayıp oluvlar boyunca iş gruppası Ervin İbragimovnıñ qaçırılması meselesini 2017 senesi fevral ayında Seulda keçirilecek 111-ci sessiyada baqacaq.

Bu aqta KrımSOS cemaat teşkilâtı tarafından yollanılğan muracaatqa İş gruppasınıñ cevabında bildirile.

Ukrain uquq qoruyıcıları İbragimov qaçırılğan soñ birden İş gruppasına muracaat etti. Muracaatqa berilgen cevapta qayd etile ki, iyün 3-te Gruppa Rusiyege bu iş boyunca malümat soratma yolladı, ve bunı alğan vaziyette ukrain uquq qoruyıcılarına haber etecek. Bunen beraber, halqara teşkilâtta İbragimovnı tapmaq içün yardım ete bilecek er angi malümatnı bildirmege rica eteler.

Endi beş ay devamında Ervin İbragimovnıñ bulunğan yeri belli degil.

Mayıs 24-te Bağçasarayda qırımtatar milliy areketi faali, Bağçasaray şeer şurasınıñ sabıq deputatı, regional meclis azası, Bütün dünya qırımtatar kongressiniñ İcra şurası azası Ervin İbragimov ğayıp oldı. Onıñ maşnası onıñ yaşağan evi yaqınlarında açıq turğan tapıldı. Ğayıp olğan, babasına aytqan edi ki, 36-cı region 350 sanlı Shkoda Octavia A 6 onı nezaret ete.

Ervin İbragimovnıñ tutulğanını onıñ evi yanındaki tükânda yerleştirilgen video nezaret kameraları qayd etti. Videoda körüne ki, Yol-patrul hızmeti hadimleri urbasındaki belli olmağan şahıslar gençni tutıp, onı beyaz renkli Ford Tranzit avtomobiline oturttı.

Bağçasaray faalleri, bunen beraber, qırımtatar faali Ervin İbragimovnıñ soy-sopları ve dostları qıdıruvnı teşkil etti. Ğayıp olğannıñ yaqınları Ervin İbragimov içün 1 million ruble mükâfat bermege azır olğanlarını bildirdi.

İyün 1-de Bağçasaraydaki «Arpat» restoranı yanında qaçırılğan Ervin İbragimovnıñ pasportı ve iş kitabı tapıldı.

Qırım boyunca RF Taqiq komiteti Ervin İbragimovnıñ babası bergen arizağa cevap berdi. Müessisenıñ matbuat hızmetinde bildirdiler ki, Rusiye Federatsiyası Cinaiy kodeksiniñ 126 maddesi 2-ci qısmınıñ «a,v» maddeleri (insannı qaçıruv) boyunca açılğan cinaiy iş taqiq etile. Ervin İbragimovnıñ bütün Rusiyede qıdırıluvı ilân etildi.

İyül 17-de qırımtatar faali Ervin İbragimovnıñ doğğan künü munasebetinen dua keçirildi.

İyül 27-de Kiyevdeki RF elçiligi yanında ğayıp olğan Ervin İbragimovge destek aktsiyası keçirildi.

İyül soñunda Qırımnı ziyaret etken frenk deputatlarınen körüşüvde Qırım prokurorı Natalya Poklonskaya ilân etti ki, Ervin İbragimovnı onıñ ğayıp olmasından bir ay keçken soñ sağ kördiler. Onıñ sözlerine binaen, yüz bergen vaqianıñ «cumhuriyet uquq qoruyıcı organlarına nisbeten tecavuz ve negativni doğurmaq içün provokatsiya» olması mümkün.

Avdetniñ bundan evel bildirgenine köre, Moskvada faaller belgisiz ğayıp olğan Ervin İbragimovnıñ fotoresimi ile levhalarnı astı.

Автор: Редакция Avdet

Редакция AVDET