Aqmescit (Simferopol) merkezinde yerli akimiyet büyük tamirni ve yol taşçıqlarını deñiştirüvni başladı, endi bu yer bombalama aqibetlerini hatırlata.
Qırım blogeri Aleksandr Gorniy «Eho Moskvı» saytında «Diversantlar Aqmescit merkezine sürip kirdi» serlevalı fotoreportajnı paylaştı.
«FSB diversantlarnen küreşken vaqıtta Aqmescit merkezinde, Qırım Nazirler Şurasından 200 m yaqınlığında, Qırım Devlet Şurasından 100 m yaqınlığında, Aqmescit şeer memuriyetinden 300 m yaqınlığında iç añlatıp olamağanım şeyler ola. Böyle şeylerni Donbassta bombalama olğan vaqıtta bile körmedim…» – dep ayttı o.
Bunen beraber, bloger qayd etti ki, tamir işleri yapılması meselesi sakinlernen muzakere etilmegen, ve hatırlattı ki, cemaatçılıq, tamir işleri yapılğan yerde eski terekler yoq etilgen soñ narazılıq bildirdi.
Gornıy ayttı ki, merkezde keçkende, şeer sakinlerinden yerli akimiyetke qarşı çoq yaramay sözler eşitti.
Onıñ sözlerine binaen, endi eki ay devamında bu yerdeki bütün ticaret toqtatılıp tura, tükânlar ve çeşit eglence merkezleriniñ saipleri zararına çalışa.
«Qaranlıq tüşkende ise, mında yürmeseñ daa yahşı olur, çünki boyun sına bile», – dep haber etti bloger.
Bu yerde skemleler, fenerler, şadırvanlar, eykeller qoyulması planlaştırıla.
Tamir işleri tahminen yarım yıl devam etecek, bundan soñ diger obyektlerge keçecekler.