Maña haber ettiler ki, şaşqan qadınçıqlar ve aqılğa yetmegen «Partiya Rosta» azası içtimaiy ağdan öz muzakerelerini sildi, o yerde köyleriniñ – Saraylı Qıyat ve Ataş Qıyat – imperiyalı damsız, manasız adlarını tarihiy milliy adlarğa deñiştirmege istegenlerni deñizge batırmaq kerek olğanı aqqında yazğan ediler.
Olardan biriniñ adı qırımlılarnıñ Vatanından sürgün etilgeninden soñ 1945 senesi avgust 21-de Rusiye Sovet Federativ Sotsialistik Cumhuriyeti Yuqarı Şurası Prezidiumınıñ emirinen deñiştirildi. Ekinci köyniñ, bunen beraber 1062 köy ve şeerniñ adları aynı müessiseniñ fermanınen 1948 senesi mayıs 18-de deñiştirildi.
Qırımtatarfoblar cinaiy işke tüşmesi mümkün olğan yazılarını silgen ola bile, amma olarnıñ qara yüreklerinde bu yazılar qalğan. Lâkin, olar öz-özüni ayıp deñizine batırdılar. Elbet, olarnıñ adına ve olarğa oşağan soylarına qattı halq tileklerini yollamaq mümkün, bu kibi: «Tiline mayasıl çıqsın» ya da «Hastalıqtan başı çıqmasın», ya da daa da qattı ve külünçli «Qursağı davulday şişsin». Amma esası şu ki, işlerde ve ğayetlerde çekilmemek kerek.
Bunıñ içün, qırımtatar tili devlet statusına binaen köy ve şeerlerniñ tarihiy adlarını qaytarmağa tırışqan köy sakinlerine ve olarnıñ deputatlarına muracaat etem.
Men çoq şeerlerge baram, ve tek Rusiyedeki şeerlerge degil, bilem ki, siziñ çoq dostlarıñız ve sizge yahşılıq istegen insanlarıñız bar, ve men olardan biri olam. Daa yaş olğanda, siziñ Vatan-Qırımğa asret çekkeniñizni körip, bu aqta ne qadar çoq olsa o qadar adamğa haber etmege qarar aldım. Men, hayırlı işleriñizde alâ daa imaye tarafı ve sizge yaramay davranğanlarğa qarşı qabaatlav tarafı olam! Çünki Vatanğa qaytuv ne qadar ağır oldı – aşalanma ve azaplardan keçip, öyle de ecdatlar toprağınıñ sabıq manzarasını yañıdan tiklemege ağır!
