Romaniya yañı baş naziri tatar qadını ola bile

21.12.201619:20

Romaniyada Parlament çoqluğı koalitsiyası, Sotsial-demokratik firqası (SDF) ve Liberal ve demokrat Alyansı (LDA) terkibinde, devlet baş naziri vazifesine Regional inkişaf ve devlet idaresi nazirligindeki devlet kâtibi Sevil Şaydehni namzet olaraq kösterdi.

Qayd etilgenine köre, Şaydeh 2015 senesi 6 ay devamında, şimdiki SDF yetekçisi Liviu Dragnâ saylavlarda dolandırıcılıq aqqında dava boyunca mahkemeniñ qararı içün istifağa çıqqan soñ, nazirlik yolbaşçısı edi. O, Romaniyada 1989 senesinden soñ, Quranğa elini qoyıp ant etken birinci nazir oldı, dep bildire TASS.

Alim ve mühbir İlşat Sayetovnıñ malümatına binaen, Sevil Şaydeh, Osmanlı Devletini araştırğanlardan eñ yahşılarından biri, professor Kemal Karpatnıñ torunı (ciyeni), ve Saledin Cambek ve onıñ apayı Muezzinniñ qızı ola.

Mühbir Osman Paşayev qayd etti ki, Sevil Şaydehniñ ecdatları qırımtatarlar edi.

Romaniya kütleviy haber vastalarınıñ bildirgenlerine köre, Liviu Dragnâ 2011 senesi Sevil Şaydehniñ süriyeli Akram Şaydeh ile ekinci nikâh merasiminde şaat edi. Sevil Şaydeh SDF-ke 2015 senesi kirdi.

Prezident ile mesleatlardan soñ Dragnâ ilân etti ki, baş nazir vazifesine başqa namzet teklifi olmaz.

Dragnâniñ sözlerine binaen, o, «adaletsiz mahküm etilgeni ve ğayrı konstitutsion qanun» sebebinden, baş nazir vazifesine namzet olıp olamay.

Romaniyada dekabr 11-de parlament saylavları keçirildi. SDF ğalebe qazandı. NEticede SDF ve LDA koalitsiyası teşkil etildi, onıñ parlamentte yerlerniñ 54%-ı bar. Bu, oña beraberlikte baş nazir vazifesine namzet köstermek ve ükümet terkibini teklif etmek içün imkân berdi.

Автор: Редакция Avdet

Редакция AVDET