Aksönov tamir etilgen Aqmescit merkeziniñ tüzetilmesini talap ete

10.01.201711:35

Qırım yolbaşçısı Sergey Aksönov Aqmescit (Simferopol) merkeziniñ ğayrı keyfiyetli tamirlenüvi aqqında öz fikrinen paylaştı.

Bunen beraber o, uquq qoruyıcı organları paytaht merkeziniñ tamirlenmesi içün mesüliyetli olğanlarnı teşkereceginde emin olğanını bildirdi.

Bu aqta Aksönov Facebook saifesinde haber etti.

«İşni ömürge keçirgen şirket bütün qusurlarnı tüzetmese ve işbu obyektni nümüne alına ketirmese, qaysı birine musafirlerni ketirmege ayıp olmaz, başqa iç sımarışlarnı körmeycek. Bundan da ğayrı, ümüt etem ki, uquq qoruyıcı organları işni ömürge keçirgen şirketniñ faaliyetini teşkerecek ve kerekli neticeler çıqaracaq. Soñki tamirni komissiya qabul etecek», – dep ayttı o, ve qayd etti ki, Aqmescit memuriyeti yolbaşçısı Gennadiy Baharevge vaziyetni şahsen nezaret etmege avale etti.

Bunen beraber Aksönov qayd etti ki, Qırım paytahtında ava vaziyeti sebebinden peyda olğan büyük çuqurlar meselesi de tez şekilde çezilmek kerek.

Bundan evel bildirilgenine köre, Natalya Poklonskaya Puşkin ve Karl Marks soqaqlarınıñ tamirlenüvi boyunca ğayrı keyfiyetli işler yapılğanına Aqmescit sakinleriniñ şikâyetlerini teşkermek muracaatınen Rusiye baş prokurorı Yuriy Çayka adına deputat arizasını berdi.

İçtimaiy ağlar qullanıcıları ayta ki, bundan evel Karl Marks ve Puşkin soqaqlarınıñ körünişi daa güzel edi, böyle tamirge ise diversiya dep aytalar.

Avdetniñ evel bildirgenine köre, Aqmescit merkezinde işçiler qaldırım taşçıqlarını ava arareti -10 dereceni teşkil etkende qoya edi. İşler, qarantlıq tüşken soñ da devam etken edi.

Bundan da ğayrı, Qırım blogeri Aleksandr Gorniy «Eho Moskvı» saytında «Diversantlar Aqmescit merkezine sürip kirdi» serlevalı fotoreportajnı paylaşıp, Aqmescit merkezindeki tamirni diversiya dep adlandırdı.

Yanvar 9-da Aqmescit (Simferopol) memuriyeti Qırım ükümetinden qış suvuqlarından pek zararlanğan yollarnıñ tamirlenüvine qoşma 100 millon ruble soracağı aqqında belli oldı.

Автор: Редакция Avdet

Редакция AVDET