Çonğarda yaqın vaqıtta Qırımğa yayınlap başlaycaq televizion qulle qoyulması yekünlenecek.
Bu aqta Televizion ve radio yayınlav meseleleri boyunca Milliy şura azası Sergey Kostinskiy bildirdi.
«Herson vilâyetindeki Çonğar köyünde yüksekligi 150 metr olğan radio ve televizion yayınlav stantsiyası quruldı. Şimdiki vaqıtta donatmalar qoyula. Fevral başından ukrain radio stantsiyalar Qırımğa yayınlap başlar. Söz, Ukrain radionıñ Birinci kanalı, Meydan, Qırım.Aqiqat radiosı, Herson FM aqqında yürsetile. Nevbetteki basamaq – raqam televizionnı teşkil etmektir», – dep aytıla beyanatta.
Kostinskiyniñ sözlerine binaen, qulle quruvı müddeti tahminen eki ay aldı. Tahminen doquz ay devamında topraq damartısı ayıruvı, yarışnıñ teşkil etilmesi kibi meseleler çezile edi.
Qulleniñ yüksekligi 150 metrdir. Bu qulle vastasınen Herson vilâyetinde ve Qırımda gece-kündüz dört ukrain radiostantsiyası yayınlaycaq. FM-diapazonda yayınlav Canköy ve Kranoperekopsk rayonlarını, qısmen Aqmescit rayonını qaplap alacaq. Televizion ve radio yayınlav meseleleri boyunca Milliy şura 2016 senesi dekabr 27-de Qırımğa yayınlaycaq dört radiostantsiyağa litsenziya berdi. Bu, Ukrain radiosı, yerli Herson radiostantsiyası, «Meydan» qırımtatar radiosı, «Qırım cemiyetleri radiosı» ola. Qırım.Aqiqat radiosınıñ ortağı – «Qırım cemiyetleri radiosı» Qırım territoriyasına FM-diapazonda 105.9 dalğasında radio yayınlavı içün litsenziya aldı.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
