Aksönov Çiygoznıñ fevral 26-da kütleviy nizamsılıq teşkil etilmesinde rolü aqqında bilmey

31.01.201721:45

Yanvar 31-de Qırım yolbaşçısı Sergey Aksönov, Ahtem Çiygoznıñ işi boyunca mahkemede şaat olaraq sözde bulunıp, Çiygoznıñ 2014 senesi fevral 26-da keçirilgen mitingde kütleviy nizamsızlıq teşkil etilmesinde rolü aqqında bir şey bildirip olamadı.

Bu aqta adliyeci Nikolay Polozov haber etti.

«Hususan Çiygoznıñ areketleri aqqında aytqanda, o (Aksönov – Avdet), miting iştirakçileriniñ bazıları binağa kirgenleri ve Çiygoznıñ areketleri arasında, gaz sepüvi ve Çiygoznıñ areketleri arasında, zorbalıq ve Çiygoznıñ areketleri arasında iç bağnı qayd etip olamadı», – dep bildire «Radio Svoboda» adliyeciniñ sözlerini.

Polozovnıñ bildirgenine köre, Aksönov, Sergey degen bir şahısnı añdı, qaysı biri Kiyev milliyetçileriniñ emissarı edi ve Aksönovğa ayttı ki, mitingde onlarca milliyetçiler buluna, Qırım yolbaşçısı ise qayd etti ki, onlarca qırmızı-qara bayraqlarnı kördi.

Adliyeciniñ haber etkenine köre, «toplaşuvnıñ birinci qısmında Sergey Aksönov ayttı ki, o, «halq göñülli quvetleriniñ» teşkilâtçısı oldı. O ayttı ki, bu, qayd etilmegen askerleştirilgen teşkilâttır».

«Aksönov ilân etti ki, bundan evel üç kün içinde (fevral 23-ten, göñülli quvetler teşkil etilgen kün, fevral 26-ğa qadar) bir qaç yüz zırhlı yelek, kaska ve qalqan satın alındı. «Halq göñülli quvetleri» iştirakçileriniñ çoqusınıñ vatandaş silâsı bar edi. Bu ise, «Russkoye Yedinstvo» firqası ve şahsen Aksönov eñ azdan nasıldır silâlı davağa azırlanğanınıñ delili ola», – dep ayttı Polozov.

Bunen beraber, o qayd etti ki, Aksönov Namus inqilâbı vaqtında Kiyevde yüz bergen vaqialarğa esaslanğan edi.

«Aksönov aytqan edi ki, Kiyevdeki vaqialarda bir qaç Qırım militsioneri elâk oldı, ve bu, onıñ fikrince, bu yerde yapqan areketlerini aqlay», – dep qoştı adliyeci.

Avdetniñ evel bildirgenine köre, Aluşta regional Meclisi (Rusiye Federatsiyası territoriyasında 26.04.2016 s. mahkeme qararınen yasaq etilgen) idaresiniñ sabıq yolbaşçısı, şeer memuriyeti yolbaşçısınıñ sabıq muavini Enver Arpatlınıñ video bağ vastasınen sorğuğa çekilmesi fevral 2-ge planlaştırılğan. O, Ahtem Çiygoznıñ işi boyunca qabaatlavnıñ esas şaatlarından biri oldı.

Bu künleri qırımtatar faali Ahtem Çiygoznıñ yaqalanuvından eki yıl toldı. O, 2014 senesi fevral 26-da Qırım parlamenti yanında kütleviy nizamsızlıqnı teşkil etkeninen qabaatlana.

Foto: RİA Novosti

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET