Qırımda eñ yaqın vaqıtta ukrain tilinde gazeta peyda olacaq.
Bu aqta Qırım Milletlerara munasebetler ve sürgün etilgen vatandaşlar meseleleri boyunca Devlet komitetiniñ yolbaşçısı Zaur Smirnov bildirdi.
«Gazeta ukrainlerniñ Qırımda yaşayışı aqqında añlatacaq. Gazetanıñ adı daa iş leyhasında buluna», – dep ayttı Smirnov «RİA Novosti» agentligine.
Onıñ sözlerine köre, gazeta Qırım ükümeti desteginen derc etilecek. Bu mesele boyunca «Qırım ukrain cemiyeti» ile añlaşma tizildi.
Hatırlatamız ki, Qırımda ukrain tilinde derc etilgen yekâne «Krımska svitlıtsâ» cemaat siyasiy gazetasınıñ neşir etilmesi yarımadada 2016 senesi mart ayında toqtatıldı. Milliy gazeta ve mecmua neşri baş müdiriniñ qararınen gazeta muarririyeti Aqmescitten Kiyevge keçirildi. «Krımska svitlıtsâ» 1992 senesinden başlap yarımadada derc etilgen edi.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
