Fevral 12-de tahminen saat 20-de Herson vilâyetindeki Çonğar köyünde arbiy urbalı silâlı şahıslar Noman Çelebicihan adına batalyonnıñ bazasını zapt etti.
Daa tasdıqlanmağan malümatqa binaen, BTR (zırhlı taşıyıcı maşna) vastasınen batalyon bulunğan yerde qora ve adamlar bulunğan çadır bozuldı.
Bu aqta fevral 13-ke keçer gecesi Küreş radiosı bildirdi.
«Silâlı şahıslar yerni (batalyon bulunğan yerni – Avdet), bütün şahsiy terkipni ve bu vaqıt territoriyada bulunğan er kesni zapt etti, küç qullanıp, yerge yatqızıp qoydı. Vaqia yüz bergen yerden kelgen malümatqa binaen, batalyon bulunğan yerde silâlı adamlar, avağa ve ayaqlarğa atıp, silâ qullandı. Muarririyetniñ elinde zararlanğanlar aqqında malümat yoq», – dep aytıla beyanatta.
Haber etilgenine köre, batalyon bulunğan yerde prokuratura ve patlav tehnikleri çalışa. Vaqia yüz bergen yerde bulunğan ATR kanalınıñ mühbirleri video aletlerine irişip olamay, çünki aletler silâlı adamlar tarafıdan blok etilgendir.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
