Yalta Bergi hızmeti mart 16-da «Skazka» ayvanat bağçası müdirlerine faaliyet toqtatma aqqında fermannı taqdim etecek.
Bu aqta fevral 27-de Qırımdaki «Taygan» arslan bağçası ve Yaltadaki «Skazka» ayvanat bağçasınıñ saibi Oleg Zubkov öz blogında yazdı.
Onıñ qayd etkenine köre, ayvanat bağçası qapatılmasınıñ sebebi, biletlerde rekvizitler ile müür olmağanı oldı, onı «tecribesizlikten, ya da diqqatsızlıqtan biletlerni yapqan şirket bastırmağandır».
«Mahkeme qısqa olacaqtır, mahkemeci sönük şekilde vesiqalarnı baqıp çıqar, bir-eki sual berir ve aytacaq ki, er şeyni yahşı añlay, acına ve ayvanlarnı seve, lâkin, añlaysıñız ki, bu siyasiy bir meseledir», – dep yazdı Zubkov.
Avdetniñ bildirgenine köre, Oleg Zubkov İstanbul civarında dünyada eñ yahşı ayvanat bağçalarından birini açmağa planlaştıra. Onıñ sözlerine binaen, «Mega-Taygan» bağçasınıñ leyha ve qurucılığı Türkiye devlet büceti parası vastasınen yapılacaq. Qurucılıq yekünlengen soñ, ayvanat bağçasınıñ bütün territoriyası «Taygan-Croup» şirketine uzun müddetke idare etüv içün teslim etilecek.
Avdetniñ evel haber etkenine köre, Oleg Zubkov Türkiye vatandaşlığını almaq içün vesiqalarnı berdi.
«Qırım baarine» qol tutqan Zubkov yerli ükümet ile bağlı davalı vaziyetlerge bir qaç sefer tüşken edi.
Bundan evel Oleg Zubkov Ukraina Yuqarı Radası deputatı, belli qırımtatar uquq qoruyıcısı ve dissidenti Mustafa Cemilevniñ Türkiye ükümet strukturasındaki bağlarını qullanmaq ve yardımını almaq azır olğanını ilân etken edi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
