Fevral 28-de, salı künü Qırım Yuqarı mahkemesinde Boğurçada yaqalanğan qırımtatarlarnıñ şikâyet arizalarınıñ baqılması başqa künge keçirildi. Olar, Marlen Mustafayevniñ evinde keçirilgen tintüvni videoğa çıqarğan edi ve bundan soñ 5 künge yaqalandı.
Marlen Mustafayev, Osman Arifmimetov, Alim Karimov ve daa üç Qırım sakininiñ işi boyunca toplaşuv mart 1-ge şaatlarnıñ çağırılması sebebinden keçirildi.
Avdetniñ bildirgenine köre, fevral 21-de Marlen Mustafayevniñ Boğurçada (Kamenka) evinde OMON iştiragi ile tintüv keçirildi. O, Rusiyede yasaq etilgen «Hizb ut-Tahrir» teşkilâtınıñ timsali olğan resim ile içtimaiy ağda eki yıl evel beyanatnı paylaşqanı içün yaqalanıp, 11 kün memuriy yaqalavnen cezalandı. Aynı vaqıtta politsiya hadimleri Mustafayevge qol tutmaq içün kelgen ve olğan vaqianı videoğa çıqarğan 10 qırımtatarnı yaqaladı. Tintüv keçirilgen Marlen Mustafayevniñ evine kelgen 11 qırımtatar kişi (Ruslan Suleymanov, Osman Arifmimetov, Remzi Bekirov, Mecit Abdurahmanov, Ablâkim Abdurahmanov, Valid Abu Farid, Seyran Murtazayev, Alim Karimov, Reza İzetov, Enver Tasinov) kütleviy merasimlerni keçirüv aqqında qanunnı bozğanları içün memuriy ceza olaraq 5 künge yaqalandı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
