Belli qırımtatar artisti, yırcı ve bestekâr Arsen Osmanov, «АRS muzik production» muzıkal studiyasınıñ tesisçisi, «Qırım» ansambliniñ solisti Asiye Saale ve mühbir, televizion alıp barıcısı Ridvan Halilov ile, yaş qırımtatar icracılarına karyera yapmağa yardım etmek içün, icat taqımına birleşti.
«АRS muzik production» yañı leyhası teşebbüsçileriniñ bildirgenine köre, yaş icracılarğa destek kösterüv merkezi teşkil etilecek, bu yerde olar zenaat karyerasınıñ inkişafı içün bütün kerek olğan şeylerni ala bilecek. Leyha boyunca, yaş icracılarğa, repertuar saylavı, ses, muzıka yapılmasından başlap, sana ustalığı boyunca master-klasslarğa qadar, destek kösterilecek.
«Çoq istidatlı genç, çeşit yarış ve istidat-şoularda ğalebe qazanıp ya da birinci yerlerni alıp, kelecekte zenaat karyerasını yapıp olamay. Vazifemiz, bu yaş istidatlarnı belgilemek ve işbirlik tutıp, maqsatqa irişmektir», – dep bildirdiler «АRS muzik production» studiyasında.
Bundan da ğayrı, kelecekte leyha teşebbüsçileri qırımtatar estrada muzıkası mektep-studiyasını teşkil etmege planlaştıra.
Leyhada kastingden keçken yaş yırcılar (15-ten 20 yaşına qadar) iştirak ete bile. Kastingde iştirak etmek içün anketa toldurmaq kerek, para tölemesi kerekmey. Anketanı bu bağlantı vastasınen endirmek mümkün.
İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
