Ukraina prezidenti Petro Poroşenko Milliy havfsızlıq ve mudafaa şurasınıñ beş rusiyeli bankka nisbeten sanktsiyalarnıñ kirsetilmesi aqqında qararını tasdıqladı.
Alâqalı malümat mart 16-da Ukraina prezidentiniñ resmiy saytında bildirile.
«Bir sene devam etecek sanktsiyalar «Sberbank», «VS Bank», «Aktsiyalı ticariy sanayı-yatırım bankı», «VTB Bank», «BM Bank» nisbeten kirsetilecek», – dep aytıla beyanatta.
Bundan da ğayrı, Ukraina Tışqı işler nazirligi Avropa birligi, Amerika Birleşken Ştatları ve diger devletlerniñ alâqalı organlarına bu aqta haber etecek ve olarnıñ tarafından da işbu uquqiy şahıslarğa nisbeten bu kibi tedbirlerniñ keçirilmesini isteycek. Ferman derc etilgen kününden işke tüşürildi.
Avdetniñ evel bildirgenine köre, mart 15-te Avropa parlamentiniñ matbuat merkezinde Bağçasarayda qaçırılğan Ervin İbragimovnıñ babası Umer İbragimov, «fevral 26» işi boyunca yaqalanğan Mustafa Degermenciniñ babası Bekir Degermenci, bunen beraber, Qırım adliyecisi Emil Kurbedinovnıñ iştiragi ile matbuat konferentsiyası keçirildi.
Mart 13-te Avropa birligi Şurası Ukraina topraq bütünligi ve mustaqilligini bozuvnen bağlı kirsetilgen sanktsiyalarnı daa yarım yılğa uzattırdı. Bu müddet 2017 senesi sentâbr ayına qadar devam etecek.
İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
