Mayıs 17-de qırımtatar faalleri İlmi Umerov, Nariman Celâl ve Lemmar Yunusov Qırım prokuraturasına çağırıldı.
Bu aqta İlmi Umerov mayıs 16-da Facebook saifesinde bildirdi.
«Yarın (mayıs 17-de – Avdet) saat 12:00-ge meni cumhuriyet prokuraturasına «davet ettiler», bu aqta bugün (mayıs 16-da– Avdet) tahminen saat 19:30-da Çuprina Valentin Aleksandroviç telefon vastasınen bildirdi… Bellesem, mayıs 18 arfesinde, laf qırımtatarlarnıñ sürgünlik qurbanlarını añma künü «qanunğa qarşı areketlerniñ yapılması mümkün olmağanı» aqqında yürsetilecek», – dep aytıla beyanatta.
İlmi Umerovnıñ tahmin etkenine köre, laf, «qırımtatarlarnıñ bazıları saat 13:00-te Aqmescitteki demiryol vokzalı qarşısındaki bağçada hatıra taşına çiçekler qoymağa istegenleri aqqında» yürsetilecektir.
Evel haber etilgenine köre, Aqmescit (Simferopol) akimiyeti Qırım faallerine mayıs 19-da «yarımadada yüz bergen taqiplerge qarşı piketni» keçirmek içün razılıq bermedi.
Avdetniñ bildirgenine köre, 2016 senesi sentâbr 29-da Rusiye Yuqarı mahkemesi Qırımtatar Milliy Meclisiniñ ekstremistik cemaat teşkilâtı olğanını tanıdı ve onıñ faaliyetini Rusiye Federatsiyasında yasaq etti.
2016 senesi aprel 26-da Qırım Yuqarı mahkemesi Qırımtatar Milliy Meclisiniñ ekstremistik teşkilât olğanını tanıdı ve onıñ faaliyetini Rusiyede yasaq etti.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
