Bağçasarayda qırımtatar bayraqlarınen yürgen avtomobillerniñ aydayıcıları para cöremesinen cezalana bile

18.05.201717:10

Bağçasarayda mayıs 18-de qırımtatar bayraqlarınen yürgen avtomobillerniñ aydayıcıları yaqalandı. Beş aydayıcığa nisbeten protokollar tizile. Bundan da ğayrı, daa üç maşnanıñ aydayıcıları belgilene.

Bu aqta qırımtatar faali Ayşe Umerova Facebook saifesinde bildirdi.

Onıñ malümatına binaen, yaqalanğan kişilerden açıqlama yazısı alındı. Olar, 10 biñ rublege qadar para cöremesinen cezalana bile.

«Yolcuları şaatlar olaraq keçecek. Ve politsiyanıñ videosında, ğaliba, daa üç avtomobil körüne, olarnı şimdi qıdıralar», – dep añlattı Umerova.

Belli ki, keçken sene maşnalarında qırımtatar bayraqları olğanı içün Sudaq, Bağçasaray ve İslâm Terek (Kirovskoye) sakinleri para cöremesinen cezalandı.

Evel haber etilgenine köre, Bağçasarayda faaller Qırım halqları sürgünligine bağışlanğan hatıra tahtası yanında, politsiya hadimleri ile bazı tartışmalardan soñ, dua keçirip oldı.

Avdetniñ evel bildirgenine köre, mayıs 17-de qırımtatar faalleri İlmi Umerov, Nariman Celâl ve Lemmar Yunusov Qırım prokuraturasına çağırıldı. Bundan da ğayrı, Aqmescit (Simferopol) rayon prokuraturasınıñ hadimleri Avdet gazetasınıñ baş muarriri Şevket Kaybullayevni yaqalavnen qorquzdı, onıñ adına nasıldır İvanov şikâyet mektübini yazdı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

бахчисарай2

Автор: Редакция Avdet

Редакция AVDET