«Medeniy Qırım» yaşlar teşebbüs gruppası, «City» antiqavehanesiniñ destegi ile, birinci qırımtatar masa oyunını yaptı, onıñ adı Tarz dep qoyuldı. Bu, arbiy-siyasiy strategiyadır, oyunda 2-8 adam iştirak ete bile.
Onıñ manası – unikal bir qaramannıñ yolbaşçılığında ordu vastasınen topraqnı zapt etüvdir. Bu qaramanlar – farqlı zamanlarda yaşağan türk tarihiy şahıs-qaramanlar – Sultan Mehmed, Alim Aydamaq, Hacı Geray, Qaplan Geray, Bora Ğazı Geray, Özbek han, Tuğay Bey, Beybars.
Er qaramannıñ rus ve qırımtatar tilinde tasviri bar.
Tarz santıraç oyunını hatırlata. Oyun devamında adım basmaqtan ğayrı, ögde yapılacaq adımlarnı tüşünmek kerek.
«Bu oyunda müim olğan şey – riyaziy esaplamadır. Daima topraqnı zapt etüv boyunca esap yapmaq kerek. Er topraqnıñ belli bir küçü bar. Onı almaq içün bu küçni yeñmek kerek. Demek ki, ordum ve duşmannıñ ordusınıñ sayısını saymaq kerekim. Bu, tez saymaq ve tüşünmek qabiliyetlerini inkişaf ettire», – dep añlata leyha idarecisi Emir Kerimov.
Medeniy Qırım taqımına oyunnı yapmaq içün bir yıl kerek oldı. Tarz yaratıcıları iyün ortasında ilk oyunnı keçirmege planlaştıra, dep bildire Crimeantatars.club.
Bu, Medeniy Qırım taqımınıñ ilk leyhası degil. Bundan evel yaşlar smartfonlar içün qırımtatar luğatını işlep çıqardı – Canlı luğat.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
