Qırım ve Donbass sakinleri biometrik tış pasportlarnı mahsus teşkerüv keçirilgen soñ ala bilecek.
Bu aqta «Dokument» devlet müessisesiniñ matbuat kâtibi Vladimir Polişuk ayttı, dep bildire «Espreso.TV».
«O yerde yüz bergen vaqialar devamında bazı vesiqalar coyuldı, şahısnı №1 forma boyunca belgilemek imkânı yoq. Nazirler kabinetiniñ qararı bar ki, qoşma belgilemeni keçirmege tevsiye ete», – dep ayttı Polişuk.
Onıñ sözlerine köre, Qırım ve Donbass sakinleri şahısnı belgilegen qoşma vesiqanı taqdim etmeli.
«Eger siz tış pasportnı yapmağa kelseñiz, Ukraina vatandaşı pasportı, identifikatsiya kodu, eski tış pasportnı ketirseñiz, biz doğma şeadetnameñizni, ya da arbiy bilet, ya da diger vesiqalarıñıznı soramaq mecburmız. Ükümetniñ diger organları vastasınen qoşma belgilev keçirile ve biometrik tış pasport berile», – dep añlattı matbuat kâtibi.
Avdetniñ evel bildirgenine köre, Avropa Birligi Qırım sakinleri içün eski şekilde tış pasportlarınıñ kirsetilüvi aqqında Ukraina prezidenti Petro Poroşenkonıñ bildirgen fikrini kontrproduktiv olğanını saya. Avropa Birligi elçisi Hüg Mingarelli ilân etti ki, vizasız nizam Ukrainanıñ bütün vatandaşları içün çalışmalı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
