Eşref Şemi-zade adına mektepniñ talebesi, Ebazer qartbabay adınen belli olğan 12 yaşındaki İbazer Kurtveliyev, kiçik olğanına baqmadan, ciddiy meselelernen meraqlana.
Keçken sene baarde yapqan öz YouTube kanalında oğlan qırımtatar qartbabası obrazında qırımtatar halqı içün aktual olğan mevzularnı meydanğa ketire: ana tilini añlamama, noğaylarnıñ yalıboylularnen soñsuz «raqipligi», «mot» adlar ve boş, halqqa fayda ketirmegen aveslikler. Ebazer qartbabay şaqalı usulnen zemaneviy qırımtatar yaşlarını ana tilinde laf etmege ve halqınıñ urf-adetlerini unutmamağa çağıra.
Böyleliknen, şaqa vastasınen, bu kibi problemalarnı mezeklep ve böyle etip olarğa diqqat celp etip, Ebazer qartbabay bizge müim şeyler aqqında hatırlata: ecdatlarımıznıñ urf-adetlerini hatırlamağa ve olarnı kütmege. Videolarda onen beraber Pakize obrazında onıñ qız qardaşı Yasmin çıqa.
Balalarğa videolarnı yapmağa olarnıñ anası yardım ete. O, operator, montajer, stsenarist ve ilhamcı ola.
«O, videolarımıznı daa güzel yapmağa tırışa. Onıñ yardımı ile kanalımız inkişaf ete», – dep añlattı Yasmin bergen intervyularından birinde.
Kiçik aktör-şaqacılarğa populârlıq apansızdan, kanalda birinci videolar peyda olğanından yarım yıl keçken soñ, keldi. Şimdi ise, Ebazer qartbabay kanalına yüzden ziyade qullanıcı abune olunğan.
İbazer dinni kütken göñülliler qorantasında yaşay, bu ailede dört esas şey aşlanıla: islâm, emekseverlik, milliy medeniyet, merametlik.
«Qorantamıznıñ er künü bir sualge cevap bermesinde esaslana: bugün bu dört saadan neler yapıldı? Ailemizniñ şiarı – faydasız bir kün keçmesin», – dep añlata onıñ anası, «Açıq yürekler» taqımınıñ göñüllisi Niyara Kurtveliyeva.
İbazer özü de bu teşkilâtnıñ göñüllisi ola, onıñ yaşında yapa bileceginden qolundan kelgenini yapa.
Oğlanğa doğğan kününe tanklar aqqında entsiklopediya ediye etilgen soñ, o, arbiy müendis olacaq, dep qarar aldı. Amma, oğlannıñ sözlerine köre, ana-babası oña öldürüv aletlerini yaratmaq ğayesinden vazgeçmege, ve halqına fayda ketirecek bir şeyge diqqat ayırmağa tevsiye etti. Endi İbazer kardiohirurg (yürek cerrahı) ya da tip müendisi olmağa istey. Oquş ve hobbiden ğayrı, İbazer tay boksunen oğraşa ve arap tilini ögrene. Yasmin ise, şekerci (konditer) olmağa istey ve anasına ev işlerinde faal yardım ete.
Bundan evel Avdet birinci qırımtatar vayneri olğan Elvira Ametova aqqında tarif etken edi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
