Bugün saba, Syitler (Nijnegorskiy) qasabasında yaşağan Renat Paralamovnıñ evinde tıntuv keçirildi. Tıntuv bitkeninen ev saibini belli olmağan tarafqa alıp kettiler. Şimdiki vaqıtqa qadar Paralamovnıñ bulunğan yeri belli degil, aqrabaları ve advokatları, onıñ bulunğan yerini anıqlap olamaylar.
«Biz Qırımnıñ FSBsında da bulundıq, ekstrimizmge qarşı küreşken Merkezde de, şeer ve rayon polis bölüklerinede telefon açtıq, amma o bir yerde yoq», — dedi advokat Mammet Mambetov.
Faaller ve advokatlar qıdıruv işlerini devam eteler ve bir qaç resmiy yerge muracaatlar azırlaylar. Lȃkin, yüz bergen adise insanlarnı kederledi. «İnsannı belli olmağan bir tarafqa alıp kettiler, qayda olğanını kimse bilmey… Adamlar kederlene, onıñ evi yanında toplaşalar, polis bölüginiñ başına muracaat azırlaylar. Soñki vaqıtları, adam qaçırtma meselesi içte yoq edi, amma şimdi kene insanlarnı, evinden alıp keteler», — dep qayd etti advokat.
Advokatnıñ tahmin etkenine köre, tıntuv, Paralamovnıñ diniy faalliginen bağlıdır. Birazdan, bu evden noutbuk ve kitaplar alınğanı belli oldı. Rusiye polis hadimleri adise boyunca izaat bermeyler, dey «QırımAqıqat».
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
