40 kün evelsi 86 yaşında Radik Ramisoviç Celȃlov vefat etti. Onıñ tercimeyialındaki bazı kerçekler ayrette qaldıra. Onıñ kommunist babasını faşist işğalcileri qurşunğa tizgen ediler, özü ise, 1944 senesi, bütün halqınen beraberlikte Vatanından sürgün etilgen edi.
13 yaşlı oğlançıq, sürgünlikke alıp ketken mal vagonlarnıñ içinden çıqıp qaça. Ve ana Vatanı Aqyarğa qaytıp kele, çoq vaqıt bıralqılanıp yüre, yalıda qayıqlar tübünde yaşay.
Bir kün yolda, oña ocası Marya İvanovna rast kele. Oğlançıqnı acıp, evine ketire, ve özüniñ vefat etken oğlunıñ metrikasını bere. Öyle etip, o Andrey Anatolyeviç Netovkin ola.
Lȃkin sakin yaşayıtı çoqqa barmay, onı qumşusı tanıy ve tatarçonok aqqında barıp satqınlıq ete. Radikni tutular ve Saratov balalar evine yollaylar.
Balalar evinden soñ Radik ağa, esnafçılar oquv yürtuna kire, andan askerlikni deñizde keçmege kete. Vesiqalarında rus dep yazılğanı keçken Netovkin, Aqyarğa yollanıla. Öyle etip, Radik ağa bir daa öz Vatanınen körüşe.
Arbiy hızmetten soñ, Netovkin Özbekistanğa kete, anasını ve tatasını tapa.
Mında, Özbekistanda, 1960 senesi onıñ oğlu Ramis Andreyeviç Netovkin dünyağa kele.
Ramis beyniñ anası, Şefiqa Kadırova, sürgnlikke çıqarılğan vaqtında, yanına bir çoq vatanına ayit fotoresimlerni ala. Böyle etip, Ramis bey, daa balalığından ana Vatanına olğan sevgige aşlana.
Yıllar keçkeninen Radik ağa Vatanına qaytmağa niyetlene, amma o vaqıtları bu ağır iş edi.
Qadınınen fiktiv ayırılma yapıp, milleti rus olaraq qayd etilgen vesiqalarınen Qırımğa kele ve yazıla.
1975 senesi, apayı ve oğlu babasına köçip keleler. Altı yıl olar pek ağır yaşadılar, ötmeknen suv aşadılar, dağlarda ilȃc otlar cıydılar ve ilȃchanelerge tapşırdılar. Soñ Radik ağa mektepke işke kirmege çare tapa.
Ramis bey ise, 1980 senesi Aqmescitte N. Samokiş adına ressamlıq oquv yurtunı bitirip grafilçi ressam ola.
Şimdi onıñ, Qırımnıñ eñ guzel köşeçiklerini aks ettirgen resimleri Ukraina ve Rusiyeniñ bir çoq muzeylerini, ve şahsiy kollektsiyalarını yaraştıra.
2011 senesi, Ramis beyniñ apansızdan vefat etkeninden soñ, Radik ağanı özüniñ evine Leylȃ Ametova – Usta, Ramis beyniñ qadını ala.
Özüniñ sonki yıllarını Radik Ramisoviç onıñ evinde keçirip, sevgi ve qayğı içinde yaşadı.
Allah rahmet eylesin!
Rifhat Yakupov
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
