Qırımnıñ Simferopol rayon mahkemesinde, İlmiy Umerovnıñ işi boyunca keçirilgen toplaşuvda qırımtatar tili mütehassısnı, Seytislâm Kişveyevni sorğuğa çektiler, buña imaye etici taraf israr etti.
Özüniñ çıqışında Kişveyev, Umerovnıñ sözlerini, qırımtatar tilinden rus tiline yapılğan tercimesinde bir sıra hatalar olğanını qayd etti.
Ondan evel Kişveyev, Umerovnıñ sözlerini ve olarğa Saledinovnıñ yapqan tercimesini qıyasladı ve özüniñ tercimesini de taqdim etti. Özüniñ çıqışında, Kişveyev, Umerovnıñ sözlerine berilgen tercimede 17 daneden ziyade hata tapqanını ayttı. Umerovnıñ ricasına binayen terciman, tapqan bütün hatalarını seslendirdi.
«Men onıñ çıqışını bütünley tercime ettim ve bir dane olsa bile, Rusiyeniñ territorial birdemligini bozmağa, yada ekstremistik areketlerge çağırğan sözler tapmadım. Men bellesem, tercime ihtisassız yapılğan», — dedi terciman mahkemede, tercimede bir söz bile deñiştirilse, metinniñ bütünley manası deñişe, dep qoştı Kişveyev.
Kişveyev dedi ki, Umerovnıñ sözlerini tercime neticesinde degil de, asıl tilde ekspertizasını yapmaq kerek edi.
19 sentâbr künü, eki tarafta munaqaşalarğa keçecegi beklenile. Ve İ. Umerov özüniñ yekünleyci sözü ile çıqa bile, dep haber ete «QırımAqıqat».
Foto: QırımAqıqat
İçtimaiy ağlarda Facebook, Vkontakte, Odnoklassniki saifelerimizg, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
