İçtimayi ağlarda qırımtatar tili audiotekasını tizmege teklif eteler

25.09.201711:37

Qırımtatar tilini canlı şekilde saqlamaq içün, yani sözlerni doğru telâfuz etmek içün, diktsiya doğru olması içün, onıñ audiotekasını tizmek kerek deyler.

Bu fikirni, Facebook qullanıcısı Suleyman Cemilev bildirdi.

«Men qırımtatar tiliniñ audiotekasını tizmege teklif etem, yani böyle bir til bankını yapılğanını isteyim. O qırımtatar tiliniñ ilmiy – araştırma institutı çalışıp başlağanınen işke tüşecek. Men bunda eminim, tek biraz vaqıt kerek. Ne yapmalımız?Büyük nesilimizniñ laqırdı tilini yazıp almaq kerekmiz. Olarnıñ çoqusınıñ tili rusçadan, türkçrden, ya da özbekçeden alınma sözlernen tolu degildir», — dep qayd etti Cemilev.

Onıñ aytqanına köre, çoqça yazıp almaq kerek: gece – kündüz, saatlernen yazmaq kerek.

«Emin oluñız, bu materialda, pek çoq qıymetli şey tapmaq mümkün olur. Amma er bir yazılğan adamnıñ adını, soy adını, doğğan yerini ve vaqıtını belirlemek kerek olacaq ve er birini bir yerge toplamaq kerek olacaq. Men bellesem, öyle bir vaqıt kelir ki, bu malümatlar, tilimizni, canlandırmağa ve zenginleştirmege imkân berir», — dep ayttı Suleyman Cemilev.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Автор: Редакция Avdet

Редакция AVDET