Yaltadaki «Hızb ut-Tahrir» işi boyunca keçken Emir Useyin Kukunıñ advokatı Aleksey Ladin, Qırım Yuqarı mahkemesiniñ, qapalı oturışlar keçirgeni içün şikâyet arizası yazdı.
Apellâtsiya ve kassatsiya mahkemeleri, bu qararlarnıñ qanuniy olğanlarını tanıdılar, onıñ içün advokat İAAM şikâyet arizasını bermege istey.
«Qapalı şekilde mahkeme oturişlarnı keçirme meselesini, biz eki kere şikâyet ettik. Birinci kere Qırımnıñ Yuqarı mahkemesinde, ekinci kere ise, Rusiyeniñ Yuqarı mahkemesine, amma eki keresi de böyle mahkemelerini qanuniy, dep saydılar. Biz ise, bu tedbirlerni qanun bozucı, dep esaplaymız ve endi İAAMne şikâyet azırlaymız», — dep yaza «QırmAqiqat», advokatnıñ sözlerini ketirip.
Advokat añlatma bergenine köre, başqa mahkeme oturışları açıq alda keçirileler, amma apis müddetini uzatma oturışları qapalı şekilde keçirileler.
Ondan da başqa advokat Rusiyeniñ Yuqarı mahkemesiniñ Plenum qararına esaslanıp «Mahkeme işleri ve olar aqqında haber alma yolları serbest olmaq kerek», olar kütülmek kerek dey.
«Mahkeme oturışları qapalı şekilde keçirilgenini makemeci, Qırımda içtimayi – syasiy vaziyet ağırlaşqanı ve qabaatlanğan Kukunıñ qabaat maddesi terroristik yönelişte olğanınen añlattı. Amma aqiqatta olarda Kukuğa qarşı iç bir şey yoq. Apiste tutma müddetini uzatılması aqqında mahkeme oturışları qapalı şekilde keçe edi, amma, ne içündir, taqiqatçılarınıñ işleri qanunsız keçirilgenine bağışlanğan şikȃyet boyunca keçirilgen oturişlaq, açıq şekilde keçirile edi», — dep añlattı advokat.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
