Qırımtatarlar Gürcistanda keçirilgen muzıkal festivalde iştirak ettiler

06.10.201713:30

Sentȃbr ayınıñ başında Gürcistanda keçirilgen «Blak Sea International Folk Festival 2017» adlı halq muzıka festivali olıp keçti. Festivalge Avropanıñ çeşit taraflarından istidatlı kollektivler davet etilgen edi. Olarnıñ sırasında Ukraina temsilcileri de bar edi. Memleketni eki kollektiv tadim etti. Bu yırcı Aliye Hacabadinova, banduracı Marina Krut ve hareografik ansambli Badem. Gazetamıznıñ muarririyeti Aliye hanımnen bağlandı ve tedbir hatıraları ile paylaşmasını rica etti.

  • Festival teşkilȃtçıları olaraq kim çıqtı? O nasıl bir şeerlerde olıp keçti?
  • Festivalniñ teşkilȃtçıları olaraq Gürcistan devlet folklor merkezi ve medeniyet Nazirligi bellidirler. Tedbir üç kün devam etti. Birinci künü Batumi şeerinde çıqışta bulundıq. Acayip şeer, onıñ eski addetleri ve yerli koloriti sezilip turmaqta. Ekinci künni Üreki şeerinde keçirdik. Üçünci künnü ise, Şekvetili qasabasında yerleşken «Blek Sea Arena» adlı kontsert zalında çıqış yaptıq. Bu zal da, ömürimde körgen eñ güzel zallardan biri edi. Birden bu zal 8 biñ seyirci kirsete bile. Sanada grim haneleri de eñ zemaneviy tehnikanen teminlengen.
  • Bizge Badem ansambli aqqıda aytıp beriñ. Olar neler icra ettiler?
  • Badem ansambli üç yıl evelsi peyda oldı. Onıñ yolbaşçısı Lenura Halilova. Derslerni ise horeograf Elnara Halilova alıp bara. Festivalde ansamblden üç oyunci bar edi. Olar Gurcistan ya da Türkkiye kollektivlerinden içte artta qalmadılar. Oyuncılarımız «Ağır ava haytarma», «Tım-Tım», «Emir Celâl» kibi avalarğa oynadılar. Seyirciler olarnı çıqışlarını pek begendiler.
  • Siz nasıl etip, festivalge Mariyz Krutnı davet ettiñiz? Duetiñizni qurmağa ağır edimi? Nasıl qırımtatar ve ukrain nağmelerini icra ettiñiz?
  • Bizler ATRde çıqarılğan «Canlı Studio» yayınında tanış oldıq. Biz tek üç kün birlikte azırlandıq ve festivalde bir qırımtatar «Qınalı parmaq» adlı yırını ve ukrain «Oy verşe, miy verşe» türküsini icra ettik.
  • Seyirciler sizlerni nasıl qabul ettiler? Ukrainadan ğayrı daa nasıl memeleketler davet etilgen edi festivalge?
  • Seyirciler bizlerni yahşı qabul etti, biz onı deral duydıq. Bizge «Bravo!», dep qıçıra ediler. Ukrainadan ğayrı mında saipler özleri çıqışta bulundı, Türkiye, Ermenistan, Yunanistan, Lehistan, İspaniya devletlerinden iştirakçiler bar edi.
  • Festival saipleri, özleri ne taqdim ettiler?
  • Olar halq yırlarını ve oyunlarını icra ettiler. Bu şeyler episi göñlimizge barıp yetti.
  • Musafirler içün ekskursiyalar azırlanğan ekenmi?
  • Bizim cedvelimiz pek sıq edi. Ekskursiya olğan olsa bile, biz baqıp yetiştiramaz edik. Amma şeerden şeerge keçkende, bu yerlerniñ güzel manzaralarınen tanış oldıq. Gurcistan halqı da pek musafirperver eken, bizlerni pek yahşı qarşıladılar.
  • Kelecekte böyle festivaller daa olacaqmı?
  • Bu festivaller er yıl keçirile ve çoq belli icracılarnı toplay. Böyle festivallerniñ maqsadı, oldıqça çoq ve çeşit memleketlerden istidatlarnı toplamaqtır. Eger bizni bir daa davet etseler, bizler memnüniyetliknen bu teklifni qabul eterik. Gurcistanda bir kere olğan olğan birisi, ömür boyu bu yerlerge aşq olur!

Subetleşken Enver Murat

Foto: Elnara Halilova, Elnara Nuriyeva

 
Объединяющая два народа бандура.

Задушевная мелодия от Марины Круть

Зажигательный грузинский танец

Марина и Алие

Ансамбль Бадем. Слева направо Эльнара Халилова, Ленура Халилова, Эльнара Нуриева.

Необычный номер от итальянцев

Диплом за покорение грузинских зрителейİçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET