Tünevin aqşam, Qırımda 78 yaşında, devamlı hastalıq, neticesinde belli qırımtatar ressamı ve quyumcısı İzet Ablayev vefat etti.
Cenaze bugün, 20 oktâbr künü, Aqmescit rayonınıñ Maryino qasabasında Yeşil soqağında keçirilecek.
İzet Ablayev 23 fevral 1940 senesi, Qarasuvbazar rayonınıñ Bahçi Eli köyünde (Bogatoye, Belogorsk rayonı) dünyağa keldi. Balalığını sürgünlikte Uralda (Perm vilâyetinde) keçirdi. 1956 senesi ana – babasınen birlikte Özbekistanğa köçti. 1964 senesinden icat etip başladı. Taşkentteki toqumacılıq Medeniyet saraı yanında yerleşken tasviriy sanat studiyasında oqudı. 1970 senesi çölmekçiliknen meraqlandı ve bir yıldan soñ Taşkent eksperemintal – icat kombinatına oqumağa kirdi. 1972 senesinde quyumcılıqnen oğraşıp başladı ve balaban muvafaqiyetlerge irişti.
1991 senesi ana vatanğa avdet olğan soñ, gençlerni çölmekçilik ustalığına ögretecek edi, amma yerleşme problemalarınen qarşılaştı.
Qırımda İzet Ablayev, çoqusı, quyumcılıq zenaatınen oğraştı. Çoq yıllar quyumcılıq ustalığınıñ neticesi olaraq, o filigran usulında milliy örnekler taşığan quyumcılıq kollektsiyasını yasadı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
