Эльвида, Эреджеп достумыз!

29.08.201915:49

26-августта Акъмесджитте яшагъан Къырым миллий арекети тешкилятынынъ (КъМАТ – ОКНД) реиси, 1991 сенесинден берли, яни II-VI Миллий Къурултайларнынъ делегаты Эреджеп Абди огълу Хайредин 67 яшында бу дюньяны терк этти.

Тамырлары Алушта районы Корбек коюнден олгъан Эреджеп Хайредин сюргюн ерлерде – Ташкент виляетининъ Гъалаба районында догъды. Мында орта мектепни битирген сонъ Кострома технология институтына кирди ве 1977 с. муэндис дипломынынъ саиби олды. Баягъы бир вакъыт шу озь районында, Солдатский къасабасында, эксперименталь-механик заводында чалышты, баш муэндис вазифесинедже котерильди. Патентлер къазангъан бир сыра кешфлернинъ муэллифи олды.

Эреджеп бей генчлигинден Миллий арекетимизге къошулып, онынъ пекинмеси ве илерилемесине озь иссесини къошты. 1989 с. о, КъМАТнынъ (ОКНД) тесисчилеринден бири олып, тешкилятта Тефтиш комиссиянынъ реиси сайланды.

Миллий Къурултай ве онынъ къурумлары мейдангъа кетирилип, чалышмагъа башлагъан сонъ, 1993 сенеси Эреджеп Хайредин, Мустафа Джемиль ве Рефат Чубардан сонъ, КъМАТнынъ учюнджи реиси сайланды. Бу намлы тешкилятнынъ олып кечкен къурултайларында (съездлеринде) о, озь етекчилик вазифесине бир къач йылда бир текрар-текрар сайланылып кельди.

1990-нджы ве 2000-нджи сенелери тешкилятнынъ фааллери ве реиснинъ шахсен озю халкъымызнынъ акъ-укъукъларыны къорчалавынен багълы чокъ онларнен умумкъырым ве умумхалкъ тедбирлернинъ ог сафларында эдилер. КъМАТнынъ озю де, Э. Хайредининъ тешеббюсинен бир сыра акцияларны тешкиль эткен эди.

Мемлекетте, бильхасса, Къырымда олып кечкен ве миллий менфаатларымызгъа токъунгъан ич бир сиясий вакъиалар КъМАТнынъ сесленювисиз къалмай эди. Тешкилятнынъ беянатлары, мураджаатлары ве дигер весикъаларнынъ метнилерини толусынен о девирдеки «Къырым» газетининъ саифереринде корьмек мумкюн.

Эреджеп Хайредин ватанпервер, миллетсевер, намуслы, джанкуер, миллий гъаеге сонъ дереджеде садыкъ инсан эди ве бизим хатырамызда ойле де къаладжакъ.

Достумызнынъ бекленильмеген вефаты мунасебетинен онынъ къорантасы — омюр аркъадашы Эсма ханымгъа, къызларына ве дигер якъынларына терен тазие бильдиремиз ве баш сагълыгъы тилеймиз.

Алла рахмет эйлесин!

Меркезий миллий къурум азалары ве дигер сафдашлары.

Автор: Редакция Avdet

Редакция AVDET