Тазие / Расим Нафе Бекир

01.11.202014:15

Акъмесджитте, Бор-Чокъракъ къасабасында отуз йыл эвельси гъайрыдан тамыр атып, дигер семетдешлери киби, озь эллеринен эв къурып яшагъан белли ерли джемаатчы Расим Нафе огълу Бекир вефат этти.

Бундан эвель чокъ себеплерге бола ёллар арасында къалгъан Расим агъа, 1994 сенеси Ватанына темелли къайтып, бутюн озь теджибеси, акъыл-идракъы, кучь-такъатыны яшагъан къасабасынынъ абадан, гузель, земаневий олмасына багъышлай.

О, мында, 2002-2012 сенелери озь-озюни идаре эткен ерли миллий къурумнынъ ёлбашчысы, 2006-2010 сс. Акъмесджит Меркезий районынынъ депутаты, Экинджи (1991-1996) ве Дёртюнджи-Бешинджи (2002-2013) Миллий Къурултай мебусаны олып сайлана. Джемаат ишлерине фааль янашып, къасабагъа сув, газ, телефон агълары кирсетильмесине, ёллар тёшельмесине салмакълы иссесини кошты.

Расим Бекир 1939 сенеси 1-сентябрьде Байдар коюнде (о заманы Балыкълава районы) догъды. Кичик бала чагъында, сюргюнлик фаджиасы нетиджесинде Озьбекистангъа тюшти. Бинъ зорлукъларны енъип, алий тасилли олды (1962 с., Ташкент политехника институты). «Узбексельмаш»та чалышты. 1970 с. башлап Ташкент Кой ходжалыгъы институтында оджалыкъ япты. Диссертация къочалап, техника илимлери намзети, доцент, бу алий окъув юртта кафедра мудири олды.

Къырымгъа къайткъан ве бираз ерлешкен сонъ, 1995 сенесинден Къырым муэндислик ве педагогика университетинде чалыша башлады ве, шу джумледен, эки кере – секиз йыл – кафедра мудири вазифесини эда этип, черик асыр эмегини онъа багъышлады.

Расим агъа ильк сефер ве сонъра да, чокъ йыллар девамында, Байдар койдешлерининъ корюшювлерини тешеббюсчи ве тешкилятчыларындан бири эди. О, оны бильген инсанларнынъ хатырасында муляйим, кулерюзьлю, алчакъгонъюлли, къонушмагъа бильген, ёргъунлыкъны танымагъан, мераметли ве садыкъ къоранта башы, бунынънен берабер, ватанпервер, миллетсевер инсан оларакъ къаладжакътыр.

Расим Нафе огълу вефат эткени мунасебетинен онынъ омюр аркъадашы Гульнар ханымгъа ве олар берабер осьтюрген учь эвлядына эм де торунларына терен тазие бильдиремиз. Джумле сой-акърабаларына сабыр ве баш сагълыгъы тилеймиз.

Алла рахмет эйлесин.

Миллий Къурултай мебусанларынынъ бир гъурухы, Бор-Чокъракъ къасаба джемаатчылыгъы, достлары, зенаатдашлары

Фото аватара

Автор: Редакция Avdet

Редакция AVDET