Теселли Янъгъызлыкъ сарды бир кедайны, дердини мен сизге айтайым. Балалыкъ чагъыны терк эткен, пис дюнья чагъына тез еткен, о сангъан, къуванчы гурь эди, раатлыкъ пек узун сюрмеди ве етти бир шемшек: денъишти яшайыш ве бутюн кетиши. Кечмиште яшангъан энди ёкъ, эр ким озь башында – дерди чокъ. Дост айтмаз биле озь ишини, аркъадаш менфаат тюшюнир. Къардашнынъ бакъышы денъишти, къардашы къузгъунгъа дёнюшти. Генч джанны сармакъта къасевет, саф къальпни чюрюте тазе дерт – олушты яманлыкъ темели, тапылмаз бу алгъа теселли. Ве сара шимди де, не языкъ, баш-сонъу корюльмез янъгъызлыкъ. Дертлерден ёрулгъан яш кедай сазында дерманны эп арай... Дюньядан теселли корьмеген саз иле, назм иле дерт тёке. 13.10.2020 ***** Ёл Меракъланам, я мен къайда ынтылмагъа ашыкъам? Ёкъса нереге кетмесем, тоялмаммы ышыкъкъа? Ёкъса къоркъам ки, бильмем не расткеледжек къаршыма? Бир ерде отуртмагъан недир бу телаш? Меракъланам, я къальбимде сёнерми олгъан эеджан? Ёкъса бар-омюр бир ерге кетер бу огълан, эй джан? Ким билир, бельки, нефсини къаплагъан, богъгъан шей – шан? Айса тёвбе сувундан тёкюльсин козьяш! Эбет, чокъ вакъыт бир ерде турмагъа пек зор келе, амма корьмек къыйметини инсандан тек кёр биле, шунынъ ичюн ынтылмагъа олса истек – ёкъ иллé. Ойле исе ёлларнынъ бармы бир хайры? Эр ёл – сайлав, сайлав исе - къыймети сонъсуз къысмет. Эр ёл – къысмет, эр инсанда къысметке коре икмет. Икмет микъдары къысметтир, къысметке фал – баша дерт. Айт, ким къысметинъ билир Раббинъден гъайры?