Пейгъамберимиз (с.а.c.) къоранта башы оларакъ

27.02.202120:26

Пейгъамберимиз Мухаммад Мустафа(с.а.с.) – озь маиети ве табиаты иле бутюн инасанлыкъта, шу джумледен  дигер пейгъамберлер арасында айры ер туткъаны шубесиздир. Аллахнынъ рахмети иле инсанларгъа яшайышнынъ эр саасында, эр вазиетте озюни догъру алып барылмасы ичюн муккемель орьнек ёлланылды. Пейгъамберимиз (с.а.с.)нинъ джемиет, къоранта, чешит аятий алларда арекетлери, сёзлери- бизим ичюн бир корьгезмедир. Онынъ ичюн, Мухаммад Мустафа (с.а.с.)нынъ джемаат эрбабы, ёлбашчы, маарифчи, тербиеджи, къоранта башы оларакъ сыфатыны огренильмеси ве бильгенлеримизни озь аятымызда амельге кечирмемиз пек муимдир.

Пейгъамберимизнинъ (с.а.с.) этрафында юксек ахлякълы джемиет шекилленди, онынъ тесири алтында нидже- нидже инсанлар джаиллик зульметинден чыкъып олды. Айны заманда да, Ресуллуллах джемиетининъ парлакъ бир бирлеми оларакъ бахтлы бир къоранта тизип олды. Онынъ айлесине, къадынларына, сонъра да балалары ве торунларына мунасебетлери бизлер ичюн энъ гузель нумюнедир.

 Пейгъамберимизнинъ къадынлары да маддий тарафындан там темин олмасалар биле, истеген шейлерини алмагъа, истеген ашларны ашамагъа имкянлары олмаса биле, озь омюраркъадашынен сонъ дередже разы ве бахтлы эдилер. Пейгъамберимиз (с.а.с.) джемаат огюндеки озь джиддий ве эмиетли вазифелерине, пек мешгъуль олгъанына, гежде куньдюз Аллахкъа дуаларда булунгъанына бакъмадан озь омюраркъадашларына пек дикъкъатлы, адалетли, незакет, урьмет, дост мунасебетини косьтере, оларны эглендирмеге, кульдирмеге ве атта эв ишлеринде ярдым этмеге вакъыт тапа эди. Ондан да гъайры, Пейгъамберимиз, озь апайлыранен чешит меселерини, атта джидиий сиясий вазиетлерини музакере эте, олардан бу, я да дигер алда насыл арекет этмеси кереклигинде меслеат сорай эди.  Амма аслы да Пейгъамбернинъ (с.а.с.) меслехат ве тевсиелерде ихтияджы ёкъ эди, чюнки къыйын вазиетлерде онъа не япмакъ кереклигине Аллах озю ишарет эте эди. Иште, не къадар икметлик! Озь къадынына урьмет косьтермек, оларнен чешит ишлер акъкъында субетлешмек, онен пайлашмакъ ве атта меслеат сорамакъ тек мумкюн дегиль де, керек олгъанына бутюн инсанлыкъкъа косьтерди.

Ресуллюллахымыз нумюнели баба ве къартбаба олгъаны да шубе догъурмаз. О затен балаларгъа буюк урьметнен янашкъан, оларны айры ве озгюн шахыс оларакъ къабул эткен, оларнен ойнамакъ ичюн вакъыт айыргъан. Севги, шефкъат, самимийлик ве мерхамет, амма айны заманда харам ве ясакъ олгъан шейлерде къаттылыкъ – Пейгъамберимизнинъ (с.а.с.) тербиевий эсаслары демек мумкюн. Ве айрыджа шуны да айтмакъ керек ки, Пейгъамберимизнинъ (с.а.с.) айткъанлары ве япкъанлары эр вакъыт тенъ келе эди, бунынъ иле даа чокъ сёзнен дегиль де япкъан ишлеринен, арекетлеринен тербие эте эди. Бу да педагогика джехетинден тербиенинъ энъ махсулдар ве эффектив усулларныдандыр.

Иште, Пейгъамберимиз (с.а.с.) озь икмети, парлакъ орьнеги иле бутюн дюнья ве бутюн земане ве келеджек несиллер гъурурланаджакъ бала ве торунларыны, юксек ахлякълы инсанларны осьтюрип, озь тербие системасында бизлер ичюн мукуммель нюмюне къалдырды.

Диляра АБИБУЛЛА

Автор: Редакция Avdet

Редакция AVDET