Наджие Бекирова «Ветан ве Бефтан»

28.05.20219:56
 Сынъырымызны йыкъып кельди
 бу йыртыджы немселер.
 Туз-отьмекнен къаршылады
 Власов ве бендерлер.
  
 Кенъ адымнен юрюп кельди
 Украина ёлунен.
 Козьлерини къан къаплагъан,
 зынджырлангъан бойнунен.
  
 Атеш септи Къырымгъа о,
 урус-татар бакъмады.
 Атешлерде тири якъты,
 ляин нелер япмады.
  
 Бала-чагъа ызгъыштылар-
 кимден имдат къыдырсын:
 баба кетти ветан ичюн,
 кимге алыны бильдирсин.
  
 Къайтып кельди бизимкилер.
 Огърадыкъ биз бефтангъа –
 "саткъынсынъыз" деп, лянет айтты
 марум къалгъан халкъларгъа.
  
 Бефтан сёзюнен татар халкънынъ
 фырсатыны алдылар.
 18 май машер куню
 вагонларгъа салдылар.
  
 Шашмалады, шашты халкълар
 бойле буюк бефтандан.
 Бакътырмады къапымыздан –
 къувып чыкъты ветандан.
  
 Сюргюн этти омюрлик бизни,
 акълы-акъсыз демеди.
 Сюрекленип ольди халкълар,
 чубюн къадар корьмеди.
  
 Эй агъалар, бойлеми эди
 Къырым халкъынынъ язысы?
 Гъурбет эллер топрагъында
 олюп битти ярысы.
  
 Нидже тюрлю куньлер корьдик,
 унутулмаз аджысы.
 Оксюз къалгъан сабийлернинъ
 дестан олды базысы.
  
 Хатырласам – багърым яна
 ольгенлернинъ сёзюнден.
 Джигер къаны козьяш олып,
 акъты халкънынъ козюнден.
  
 Аз олдымы акъсыз ерде,
 ветан саттынъ дегенлер.
 Акъ джигерден "Ах" чектилер
 гъурбет эльде юрьгенлер.
  
 Манълайыны тер къаплагъан,
 къыймай джанынъ бермеге,
 асрет олып ольгенлер чокъ
 Ана юртыны корьмеге.
  
 Таш-топрагъы беклей бизни
 ады Гузель ветаным.
 Ольсем эгер, къабристаным
 Къырым олсун мекяным.
  
 Эй, Аллахым, йыкъылмасын
 шу Къырымнынъ диреги.
 Чокъ хорлукъ чекти татарлар,
 дерт бийледи юреги.
  
 Шимди исе татар халкъы
 Ветан талап этмекте,
 дердине дерман къыдыргъанлар,
 Кавказ бетке кочьмекте.
  
 Къысмет олсун сейран этмек
 Къара денъиз далгъасыны.
 Къысмет олсун ашамакълар
 шу Къырымнын алмасыны.
  
 Къокълар эдим тоя-тоя
 шу Къырымнынъ гулюни,
 мор мелевше, эрылгъанлар,
 мис къокъугъан зумбульни.
  
 Ветан демек озь эвимиз.
 Буны эр кес бильмели.
 Ветан пешинде юрьгенлерге
 эпимиз ярдым этмели.
  
 Буны язгъан джаиль апай
 бир ишчининъ къадыны,
 ветанына асрет олгъан,
 сораманъыз адыны.
  
 1966 йыл. Нижняя Баканка. Краснодарский край
   

Автор: Редакция Avdet

Редакция AVDET