Тазие / Рустем Якубов

05.11.202119:47

4-ноябрьде достумыз ве зенаатдашымыз — чёльмекчи, эйкельтраш, оджа, догъру ве темиз юрекли, ватанпервер инсан

Рустем Якубов

ковид хасталыгъы нетиджесинде, бу дюньяны терк этти. О, 1966 сенеси, августта Ташкент виляетининъ Кибрай къасабасында дюньягъа кельди. Онынъ бабасы — Сеит-Мемет Якубов белли чёльмекчи, Советлер бирлиги Рессамлар бирлигининъ азасы эди.

Рустем бей Озьбекистанда Беньков адына джумхуриет бедиий билим юртусында окъугъан сонъ 1988-1993 сс. Ташкент театр-бедиий институтынынъ бедиий чёльмекчилик болюгини битирди. 1998 сенесинден Акъмесджит Бедиий фондунда рессам-чёльмекчи олып чалышты. 2002-2013 сенелери Къырым муэндислик ве педагогика университетинде, декоратим-амелий санат кафедрасында мувафакъиет иле оджалыкъ япты. Бу сыфатта эм де зенаат фаалиетинде о, Къырымда чёльмекчилик санатынынъ тикленильмесине озь салмакълы иссесини къошты. Бунынънен берабер, Рустем бей чокъ ве чешит бедиий сергилерде иштирак этти.

О, бир сыра монументаль эсерлернинъ муэллифи. Шу джумледен, Копюрли кой (денъишкен ады Черемисовка) янындаки мында догъгъан эфсаневий халкъ къараманы Алим Азамат огълуна тикленильген озьгюн абиде-стела, «Айше», «Керван-Сарай», «Ай-Петри» ресторанларыны ве башкъа ерлерини яраштыргъан чешмелер — онынъ чеберли къоллары астындан ве истидат дуйгъулары тесиринен чыкъкъан бедиий махсулатлардыр.

Рустем Сеит-Мемет огълу Якъуб вефат эткени мунасебетинен онынъ анасы Мухлисе аптеге, омюр аркъадашы Элеонорагъа, учь эвлядына ве дигер акъраба-якъынларына самимий тазиемизни бильдирип, тюкенмез сабырлыр ве баш сагълыгъы тилеймиз. Алла рахмет эйлесин, джаны дженнетте олсун.

Достлары, зенаатдашлары.

Фото аватара

Автор: Редакция Avdet

Редакция AVDET