Эльвида, къараман Лютфи-деде!

30.04.202212:20

Миллетимиз буюк джоюкъкъа огърады: Миллий арекетимизнинъ темелинде тургъан инсанларымыздан бири, 1968 сенеси къорантасынен Къырымгъа – Къурман районынынъ Некрасово коюне авдет олып ве даима мында яшап, дигер сафдашларынен берабер, бутюн халкъымыз Ватангъа къайтмасы ве миллий мухтариет тикленмеси огърундаки курешини чокъ фааль тарзда девам эткен Лютфи деде Бекир огълу 94 яшта фаний дюньяны терк этти.

О, Ватангъа кельгенинден дёрт сене кечер-кечмез – эки бучыкъ йылгъа, лагерьден къайткъанынен беш сенеден сонъ – даа дёрт йылгъа азатлыкътан марум этильди ве бу муддетни сонъунадже чекти. Къатты джезаларнынъ себеби, Лютфи агъанынъ адалетперверлиги саесинде махсус органлар тарафындан онъа къаршы уйдырылгъан фитнелер олды.

Токътамагъан такъип-къоркъузувларгъа бакъмадан, о, Миллий арекеттен четлешмеди ве даима энъ фааль джемаатчылар сырасында булунды. Онен, о заман сымарыш алып, субетлешкен москвалы журналист, асылында теджрибели пропагандаджы, айрыджа азырлагъан «докладная»да, о тарафтаки джумле ватандашларымызны козьде тутып: «главным идеологом их выступает 40-летний Лютфи Бекиров, инженер по образованию», деп язгъан эди…

Лютфи агъа 1928 сенеси 5-декабрьде, Багъчасарай районынынъ Эски-Юрт коюнде (1960-сс. сонъундан шеэр сынъырында) догъды. Дженк вакътында осьмюр, фашистлерге къаршы догърулгъан вазифелер беджерди. Лянетли сюргюн нетиджесинде къоранталары Бекабад районынынъ къайсы бир къышлагъына тюше, сонъра шеэрге коче.

Етишкен Лютфи заводда торнаджы олып чалыша. Бу зенаат боюнджа баягъы мувафакъиетлер эльде этсе де, алий тасиль алмагъа ынтыла, Ташкент политехника институтында окъуй, тезья ве алетлер муэндиси ола. Терс шараитте, хорлангъан-ашалангъан халкъымыз ичинде бильгили олмакънен берабер Къырым давасына къошулгъан йигит ве къызлар арасында Лютфи агъа да бар эди.

О, Бекабадта яшагъан Миллий арекет эсасчылары ве етекчилеринден бири, озь оджасы сайгъан Джеббар Акимовнен якъынлаша, онынъ, чокъ месулиетни ве гизлиликни талап эткен, вазифелерини беджере. Мисальчюн, бир сёз: «Башлаймыз!», деп язылгъан тезкерени (записка) Ферганагъа, дигер эфсаневий шахсымыз – Бекир Османовгъа алып бара.

Имза ве пара топламакъ, тешеббюсчи гурухлар арасында багъ тутмакъ, векиллерни Москвагъа ёлламакъ, оларнынъ эалимизге эсабат берюв топлашувларыны тешкиль этмек, 18-майыс, яры гизли, тедбирлерини ве наразылыкъ акцияларны отькермек – булардыр Лютфи агъанынъ, корюмли джемаатчы сыфатында, эткен ишлер. Такъиплер, оларнынъ сырасында15 куньге къапалмакъ, олуйыджы шейлер эди.

«Оргнабор» вастасынен Къырымгъа авдет эткен Лютфи агъанынъ Ватанда да халкъымызны акъ-укъукълары тикленмеси огърунда фаалиетини кене де анавы пропагандаджы-журналист кетирген сёзлери тасдикълай.

«Каковы же были взгляды и чаяния крымскотатарских репатриантов, что их волновало? Об этом рассказал Лютфи Бекиров: «Мы требуем… создать крымскотатарскую автономию. Вопрос об автономии уже поднимался. Нам говорили: вас в Крыму будет 20-30 процентов. А переселяют сколько? 100 семей в год. При таких темпах всех 500 тысяч привезут только через 100 лет. Автономия –  иначе нация должна умереть! Мы не хотим оставаться в местах ссылки. Мы, молодые люди, рвемся исправить свое положение. Мы поём о Крыме в Узбекистане»…

О, сонъунадже айдын акъыл, халкъ такъдири ичюн самимий къайгъы, дюньядаки вакъиаларгъа меракъны сакълап яшады. 2021 с. сентябрь башындаки белли, джинаиджесине къаба ве фитне вакъиаларгъа сесленип, эр кес ичюн рус тилинде мураджаат язып, ичинде «эр бир къой озь баджагъындан асыладжакъ» ибарени хатырлатып, оны ана тилимизде: «Нариман Джелял, огълум, Аллах сизлерге сабыр ве къувет берсин бу зулумларнынъ тюбюнден чыкъмагъа», — деп екюнлеген эди.

Акъикъатен, Лютфи агъа джанкуер, джесюр, беджерикли, месулиетли, бильгили, миллетпервер, алчакъгонъюлли, бойсунмаз бир инсан эди ве ойле де хатыраларымызда яшайджакътыр. Якъын келеджекте онынъ адыны Къырымда сокъакълар ташыйджагъында эминмиз.

Лютфи Бекир огълу вефат эткени мунасебетинен онынъ буюк къорантасына, эвлятларына, шу джумледен, огълу – Миллий арекет иштиракчиси, Алабаш-Къонърат (сахте ады Амурское) кой шурасынынъ чокъйыллыкъ сабыкъ реиси Рустем бей Бекировгъа, торун ве торунчелерине, дигер акъраба ве якъынларына терен тазиемизни бильдирип, баш сагълыгъы ве сабырлар тилеймиз.

Лютфи деде Алланынъ рахметинде булунсын.

Меркезий Миллий къурум азалары, Миллий Къурултай бир гурух мебуслары, Къурман джемаатынынъ фааллери, достлары, сафдашлары.

Автор: Редакция Avdet

Редакция AVDET