Бу куньлери Кезлевде «Тасиль анахтары» конкурсынынъ нетиджелери илян этильди. Ярышнынъ макъсатлары, вазифелери гъалиплери акъкъында Avdetke «Фиданчыкъ» окъутув меркезининъ ребери Лейля Белялова тариф этти.
Энъ башында фикиримиз – мектеплерде, бала багъчаларында ве инкишаф меркезлеринде чалышкъан перспектив оджаларны бир ерде топламакъ эди. Олар бири-биринен мунасебетлер къурсынлар, теджрибелерини пайлашсынлар, энъ яхшы теджрибелерни даркъатсынлар деп бир платформа яратмакъ истедик. Сонъра бу фикир бойле бир ярыш, педагоглар фестивали шеклинде джанланды.
Ярышнынъ энъ эсас макъсады – инновацион педагогик теджрибеси олгъан, перспектив ве фааль оджаларны ортагъа чыкъармакъ, инкишаф эттирмек ве оларгъа къол тутмакъ.
Ярышнынъ вазифелери: къырымтатар тилини окъутувда янъы усуллар бельгилемек; оджаларны сербест муитте бирлештирмек; яш оджаларнынъ мотивация севиелерини юксельтмек.
Ярыш эки басамакътан ибарет. Биринджи басамакъ ана тили кунюне багъышланып, февральнинъ 21-инде башланды (шу куню «Тасиль анахтары» ярышынынъ догъгъан куню деп саймагъа мумкюн).
Оджалар дистанцион шеклинде 3 къысымдан ибарет олгъан сынавдан кечтилер.1-инджи – тиль бильгисининъ севиесини бельгилемек ичюн 20 умумий суаль, 2-нджи – Къырымнынъ тарихы ве медениетинен багълы бильгилернинъ севиесини бельгилемек ичюн 20 суаль, 3-юнджи – видеовизитка, оджалар 3 дакъкъанынъ ичинде озюни танытмакъ керек эдилер.
II басамакъ Кезлевде кечирильди. Финалда оджалар апрельнинъ 28-инден 30-уна къадар «Джеваль» отелинде булунып 10 такъым оларакъ бир-биринен ярыштылар ве гъалебе тек 3 такъым къазанды.
Финалда оджалар ичюн мастер-класслар кечирильди, чешит методик ишленмелер, оюнлар ве дигер файдалы малюматнен таныш олдылар. Гъалиплер багъшышлар, китаплар ве пара мукяфатыны къазанадылар.
Ярышнынъ керчеклешмесине юреклери даима къырымтатар халкъынен берабер олгъан инсанлар къол туттылар. Ярышкъа азырлангъанда лейхамызны чешит сааларда чалышкъан инсанларгъа анълаттыкъ, эр кестен ойле бир дестек ис эттик ки!
Оджаларымызгъа, тешкилятчыларымызгъа инангъан, къол туткъан, ярдым эткен инсанлар чокъ олды: Диляра ханым Якубова ве «Джеваль» комплексининъ хадимлери, Бекир Чобан-заде адына Хайрие фондунынъ тесисчиси Ресуль бей Велиляев, Наджие ханым Феми ве Тимур бей Аблаев, Сыддыкъ бей ве Эльвира ханым Табах, Арслан бей Рамазанов (Акъмесджиттен), Руслан бей Абдуллаев (Зуядан), Адиле ханым ве Шаип бей Ахтемовлар, Ички къасабасынынъ Джайляв коюнинъ джемааты, Майе оджа Анафиева (хореограф), Иса Исмаилов (алып барыджы), Луиза ханым Усеин (актриса), Асан ве Эмине Усеиновлар (иджаткяр аилеси), Феридэ Асанова (йырджы), Зейнеп Адживелиева (педагог), Айдер оджа Булатов (Акъмесджит халкъара мектеп мудири), Найле Бекирова (график дизайнери), Терджиман китап эви, Лемлиевич ширкети ве КъМПУ-нинъ волонтер студентлери. Оларгъа самимий миннетдарлыгъымызны бильдиремиз!
3 ер:
- Ильясова Диляра, МКУДО РК «Белогорская детская школа искусств» (Къарасувбазар бала музыка мектеби, кемане оджасы);
- Биюкчан Зоре, МБОУ «ВИНОГРАДНЕНСКАЯ СОШ» Еди-Къую районынынъ къырымтатар тили ве эдебияты /рус тили ве эдебияты оджасы;
- Заитова Эвелина, » АВМ» балалар инкишаф меркези.
2 ер:
- Эмирвелиева Алиме, «Тенистое мектеби» МБУМси. Багъчасарай районы, инглиз ве къырымтатар тили ве эдебияты оджасы, мудирнинъ тербиев боюнджа меслиятчысы (советник директора по воспитанию);
- Османова Диляра, «Чистенькое мектеби» МБУМси, къырымтатар тили ве эдебият, рус тили ве эдебият оджасы;
- Джеппарова Эльмира, МБОУ»Украинская школа», математика оджасы. Акъмесджит районы.
1 ер:
- Джемилева Ферузе, Акъмесджит шеэри МБУМ «Эшреф Шемьи-заде адлы 42-инджи ОУМ», башлангъыч сыныф оджасы;
- Бориева Эльвира, МБУМ «Эшреф Шемьи-заде адлы 42-инджи ОУМ», башлангъыч сыныфларда къырымтатар тили оджаларынынъ усулбирлешмесининъ рехбери;
- Аккиева Ленара, МБТМ Акъмесджит шеэри 42-нджи Эшреф Шемьи-заде адлы мектеп, башлангъыч сыныфлар оджасы.
