Mustafa Cemilev Kiyevde resmiy ziyaret ile bulunğan Türkiye siyasetçilerinen körüşti

19.12.20000:00

 

2010 senesiniñ 25 fevral künü Qırımtatar Milliy Meclisniñ reisi, Ukraina halq deputatı Mustafa Cemilev Kiyevde Ukrainanıñ yañı Prezidenti Viktor Yanukoviçniñ inauguratsiya tedbiri munasebetinen bulunğan Avrupa Şurasınıñ Parlament Assambleyası reisi Mevlüt Çavuşoğlu ve Türkiye Cumhuriyeti Tış işler naziri Ahmet Davutoğlu ile körüşti.

Kiyevdeki “Hayat” musafirhanesinde keçirilgen körüşüv devamında M.Cemilev türk siyasetilerini qırımtatar halqınıñ aktual meseleleri aqqında haberdar etti. Bunınen beraber, Yaqın Şarq sualleri boyunca Ukrainanıñ mahsus temsilcisi vazifesi üzerindeki meseleler de baqıldı. Bu vazifeni öz qararı ile Ukrainanıñ sabıq prezidenti Viktor Yuşçnko 2010 senesiniñ 23 fevral künü kirsetti. Ondan da ğayrı, Mustafa Cemilevniñ İslâm Konferentsiyası Teşkilâtnıñ General Kâtibi, professor Ekmeleddin İhsanoğlunen körüşüv meselesi baqıldı.

Körüşüvniñ soñunda Cemilev Mevlüt Çavuşoğluna – XVI as. qırımtatar pıştavnı, Ahmet Davutoğluna XVII as. qırımtatar qılıçnı bağışladı.

Опубликовано Рубрики Без рубрики