Qırım musulmanlarınıñ lideri haci Emirali Ablayev Qırım sakinlerini mayısnıñ üçünde Bağçasaray rayonında ötkerilecek Hıdırlezde iştirak etmege davet etip olamay, çünki bu diniy bayram degildir. Amma Qırım müftisi bu insanlarğa körüşip qonuşmağa imkân bergen milliy bayram olğanını hatırlattı.
«Bugün bazı adamlar «Hıdırlez diniy bayrammı, yoqmı? Anda barmağa mümkünmi?-dep soraylar. Biz ise bu dinimizge ait olğan bir bayram olmğanını aytamız, onıñ içün Hıdırlez aqqında qararnı çıqarıp olamaymız. İnsanlarnı davet etmek ya da barmamağa çağırmaq da yañlıştır. Biz bu bayram ecdatlarımızdan kelip çıqqanını hatırlamaq kerekmiz. O insanlarnı dostluqqa, birlikke çağıra. Mında içkicilik, yaramay şeyler, qavğa olmamaq kerek. Hıdırlez körüşmek, qonuşmaq içün imkândır. Dinimizge köre, bu yasaq etilgen bir şey degildir.»,– dep qayd etti haci Emirali Ablayev.
Bundan da ğayrı, o qoştı ki, Qırım musulmanları diniy idaresi Qırım musulmanları ve qırımtatarlarnen bağlı bütün tedbirlerde er zaman iştirak ete edi. «Biz davet alğan yerlerge er vaqıt kele edik. Şahsiy menim içün bu er kesni daa bir kere barışıqqa davet etmege imkândır. Başqa maqsadlarım yoq. Diniy idaremiz siyasetke qarışmaycaq, siyasetnen siyasetçiler oğraşsın, biznesnen- iş adamları, dinnen- din erbapları, yani Qırım musulmanları diniy idaresi»,- dep ayttı haci Emirali Ablayev.
Belli olğanı kibi, bu sene Hıdırlez mayınsıñ üçünde Bağçasaray rayonında, Aqmescit-Bağçasaray yolunıñ 25-nci kilometrinde ötkerilecek.