Бир къач кунь эвельси, 25-январьда, кенъишлиги сынъырсыз олгъан чокъ мемлекеттеки джемаачылыкъ Владимир Высоцкийнинъ 73 йыллыгъыны къайд этти.
Мешур йырджы-бард, буюк шаирнинъ озьгюнлиги, феномени але даа айретте къалдырмакъта ве але даа огренильмекте. Онынъ язгъан шиирлери догърудан-догъру халкъымызнынъ о замандаки вазиетине токъунмаса да, онынъ иджадынынъ исьянджылыкъ руху адалетсиз джинабет сюргюнликнинъ джезасыны чеккен ватандашларымызгъа пек анълайышлы ве якъын эди.
Ашагъыда дердж этильген В. Высоцкий «Эв» шиирининъ терджимеси онынъ апансыз олюмининъ (август, 1980 сенеси) тесиринде япылгъан эди. О заман тиль, хусусан, имля бильгилерим зайыф эди, онынъчюн къусургъа бакъманъыз – деерли, олгъаны киби «Авдет»ке теслим этем. Даа бир къайд: сонъки сатырдаки «халкъны яргъан сёз» оригиналда якъын ёкъ – бу сербест терджименинъ алямети мында бизим вазиетимизни косьтермек ичюн кирсетильген эди.
Бекир Мамут.
Ябан ЭВ В. ВЫСОЦКИЙ
Геджеге баткъан,
Сеси чыкъмагъан,
Джады-ель анъгъан
Оксюз эв тура.
Пенджересини —
Дженнет ресими —
Тек ёл коксюне
Ача эр сыра.
Болдурдым, талдым,
Атымны чездим,
Ярдым сорадым:
«Тири бармы, чыкъ!»
Этраф тынч къалды,
Сырны ачмады.
Къара къуш далды,
Сая орталыкъ.
Эвге ким кирмез —
Джан-сыкълет, кумес.
Дост-душман кульмез —
Четке козь ата.
Илинген Къуран —
Дюгмеси къопкъан…
Къансыз джанда къан
Беденде бата.
Башланды субет.
Санча бетни бет.
Кемане — адет
Олюмге чала…
Чыкъарды, хынзыр,
Дакъкъа — бир асыр,
Пычагъы — азыр
Манъа козь ала.
«Джемаат, айт манъа,
Бунда не мана?
Кокте фырлана
Чыракъсыз гедже.
Авасыз кечкен,
Омюрни ичкен,
Тамырын ичкен
Чыкъа бу гондже!
Эсни ерине такъ,
Эзильдим, ахмакъ,
Шарап бармы, бакъ,
Эй, эв сабысы!
Джевап: — «Сен ёлда
Чокъ олдынъ, ол даа,
Чаре — къолумызда,
Келир сабасы».
«Ашап от, къочан,
Чайнап топракъ, джам,
Туршуланды джан,
Чюрюмек — огде.
Шарап къошулды,
Миймиз бунъады,
Эвимиз бош олды
Асыш, дёгюштен.»
Атымны эздим,
Къазаны енъдим…
Тапкъаным эдим,
Такъдир, бу ярыкъ?
Ялварам — корьсет,
Юрекке арз эт,
О кулькю асрет —
Онъа уяныкъ.
Ойле эвлернинъ
Джойдыкъ излерни,
Акъ-куньдюз ерни
Алышып алдыкъ.
Огренип кельдик,
Ачувлы эдик,
Ондан енъильдик,
Къара куль олдыкъ.
Кене — ёлма-ёл,
Орюмджектен бол,
Аякъ — бас, сагъ-сол,
Бакъкъанда бакъ, козь.
Не къадар кечти,
Кимден къан ичти,
Кимге эс ачты
Халкъны яргъан сёз.
25 января 1938 г. родился Владимир Высоцкий-поэт, бард, актёр, автор нескольких прозаических произведений. В годы строгой цензуры Высоцкий затрагивал целый ряд запретных тем, отчего и сам во многом был под запретом, но, несмотря на существовавшие ограничения, популярность Высоцкого была и остается по сей день феноменальной. Это обусловливается человеческим обаянием и масштабностью личности, поэтическим даром, уникальностью исполнительского мастерства, предельной искренностью, свободолюбием, энергетикой исполнения песен и ролей, точностью раскрытия песенных тем и воплощения образов.