2017 seneniñ toylarında mot olğan şeyler

18.09.201721:07

Er bir toy mevsiminiñ özüne ayit hususiyeti bardır. Daa tünevin mot dep sayılğan şey, bugün endi adet olğandır. Bügün ise, biz, 2017 senesiniñ toy mevsimi neler ile belli olğanını, sizlernen paylaşmağa isteymiz.

Toy sanayısınıñ belli faali Ablâz Gerey, Avdetke qırımtatar toylarında peyda olğan, yañı dalğalar aqqında böyle aytıp berdi. Onıñ bildirgenine köre, bu mevsimde çıquv nikâhları mot oldı, yani, imam efendi camiden başqa bir yerge alıp ketile ve anda yaşlarnıñ nikâhlarını qıya. Böyle yerlerniñ eñ populâr ve meşurı – «Alem» ve «Sarabuz» etnik restoranları oldılar.

никях

Foto: Ahtem Useinov

Amma daa bir on yıl evelsi nikȃh adeti, kelinniñ evinde keçirile edi. Tek yñı camiler peyda olğanınen ve eskileri tiklengeninen, bu merasimni Allahnıñ evinde keçirmek mot oldı.

Hatırlayıq, bir qaç sene evelsi, Avropa adetinde olğanı kibi, resmiy nikâhlar idareden çet, çıquv yerinde yazıla edi, boyle qayd etüvlerge kelin ve kiyev dostları renkleri ve modelleri biri – birine oşağan urbalar kiye ediler. Kelinni ise, tantanalı etip, onıñ babası alıp çıqa edi.

Bu sene ise aynı böyle nikȃhlar mottan çıqtı. Ablâz Gereyniñ aytqanlarına köre, keçken sene çıquv nikâhlar içün ayırılğan yerlerniñ kiraları orta qararda olğan olsa, bu sene böyle yerler pek paalılaşıp ketti.

Meselȃ, Aqmescitniñ eñ mot yeri sayılğan Gruşevıy gülniñ yanında nikȃh merasimi 6 biñ rublege aylanacaq, bu da tedbirde 20 adamdan çoq olmasa, ve foto – video çekmesi de ayrı fiyatqa kirip, 3 biñ rubleni teşkil ete bile.

Yaşlar tütün içinde

Toy devamında artistler ve yırcılarnıñ çıqışları da populȃr qalmaqta. Şimdi sıq – sıq vatanperver türküleriniñ, milliy bayraqlar ile icra etilgenini eşitmek mümkün. «Tantsi jivota» ise, şükürler olsun, yoq olıp kettiler. Söz kelimi, lezginkalarda azlaştı.

Yañı mahsus effektlerden biri de, qar ile tütün yibermektir. Böyle güzellik altında kelin kiyev özleriniñ birinci oyunlarını icra eteler

дым

Foto: Ahtem Useinov

Qısmet değil

Muzıkantlarnen bağlı adette sıradan çıqa. On yıllardır, muzıkantlarğa toplanğan paradan bermek adeti bar edi. Halq arasında oña «qısmet» dey ediler. Şimdi ise muzıkantlarnıñ 90% añlaşmanen çalışalar, yani olar öz işleri içün maaş alalar, oyunlardan tüşken para ise, yaşlarğa qala. «Qısmet» adeti yavaş – yavaş medeniyetimzden yoq ola.

Kelin urbası

Er bir kelin özü içün dülber ve tekrarlanmaz toy anteri tapmağa istey. 2017 senesi kelinlik anterleri aqqında, bizge Yasmin Bucurova aytıp berdi.

Onıñ aytqanlarına köre, bir qaç seneden berli nazik – süt ve krem renkleri mot. Oyanen yaraştırılğan anterler ise, öz yerine faktur basmalarnı, balaban çiçekli ve nağışlı modellerini ketire.

«Anter piçimlerin de ise, köre, pos ve uzun etekler mottır. Başlarına taqılğan fatalar da uzun ve er taraflama nağışlanğan ola», — dep ayta Yasmin Bucurova.

Milliy anterler de, yıl yıldan populȃr ola. Bu, ellbette er kesni pek quvandıra.

«Milliy anterlerde, ayrı diqqat yaqağa berile, o kiçkene ve boğaz tübüne yapıla. Renkler ise, sakin beyazlarından başlap, yeşil, ya da erılğan tüske qadar ola. Amma eñ populȃr olaraq, kene de nazik – süt renki qala», — dep öz tecribesinen paylaşa Yasmin Bucurova.

ясмин ясмин1 ясмин2 ясмин3

Daa evel, biz sizler içün zemaneviy qırımtatar toyları aqqında malümat azırlağan edik.

90 – nci seneleri qırımtaatr toyları aqqında ise, siz bu videonı baqıp hatırlay bilesiñiz.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET