Ноябрь айнынъ 26-сында самимий ве кулерюзьлю, ватанпервер инсан Русфет Халилов бу дюньяны терк этти.
Апрельнинъ 24, 1956 сенеси Алмазар коюнде Сейтмемет агъа ве Гульсум татанынъ къорантасында дюньягъа келе. 1982 сенеси Ташкенттеки электротехникий институтны битирди. 1987 сенеси Эдие ханымнен къоранта къуралар. 1992 сенеси аилесинен Къырымгъа кочип, Алма-Тархан коюнде ерлештилер. Заман зорлукъларыны яшап, бир шейге бакъмадан, озь топрагъында кенди эллеринен эв къурып, буюк, акъикъий къырымтатар аиленинъ башы олды. Чокъ йыллар девамында койнынъ ерли меджлис азасы, кой шурасынынъ депутаты, сонъки йыллар дин-джемиетнинъ азасы олды. Халкъымызнен багълы ич бир меселеде четте турмады. Эр заман биринджи сыраларда, эр заман сыджакъ юрекнен Ватан ичюн, миллет ичюн арекет этти. Джемаат тарафындан къазангъан севги ве урьметине керчектен ляйыкъ эди. Аллахнынъ эмри иле, Русфет Халилов ноябрьнинъ 26 куню саба эрте Киев хастаханесинде кениш инфаркттан вефат этти. Достларынынъ ярдымы иле дженазе намазы Къырымда эртеси куню къыйылды. Эр заман ярдым къолуны узатып, бир мерасимден четте къалмагъан Русфет агъамызны озгъармакъ ичюн, Къырымнынъ чешит кошелеринден пек чокъ инсан топланды. Эр кез оны самимий, мераметли, шакъаджы, къансыджакъ инсан киби таный эди. Кок байракъ исе – фикир ве джанынынъ акиси эди. Русфет агъанынъ учь огълу ве дёрт торуны олды. Омюр аркъадашы Эдие татанен 32 йыл бирликте ян-янаша кечирдилер. Шефкъатлы къоджа, садыкъ дост, яхшы баба, севгили къартбаба… Шубесиз, бу телефни ич бир шей толдурмаз. Азбарында даима авеленген алтын тамгъалы байрагъы сюкюнетте. Оны о къадар севген ве ич унутмагъан саиби энди ёкъ. Лякин, Русфет агъамызнынъ алтын юреги ве самимий тебессюми эбедий хатырамызда. Аллахнынъ эмири. Мекяны дженнет олсун.
