Oktâbr 18-de Qırım Yuqarı mahkemesi «fevral 26» işi boyunca yaqalanğan Ali Asanovğa nisbeten Aqmescit Merkeziy rayon mahkemesi mahkemecisiniñ qararını deñişmey qaldırdı.
Ali Asanov SİZO-da 2017 senesi yanvar 7-ge qadar bulunacaq.
Adliyeci Edem Semedlâyevniñ bildirgenine köre, bunen beraber, mahkemeci Ali Asanov qafeste degil de, adliyeci yanında bulunması aqqında imayeniñ şefaatını red etti.
«Amma prokuror Dilâra Serverovna, Ali Asanov nasıl statusta bulunğanını ögrenmeyip bile, Aliniñ qafesten tış bulunğanına qarşı oldı ve onıñ SİZO-da qaldırılmasını israr ete edi», – dep yazdı Semedlâyev Facebook saifesinde.
Adliyeciniñ sözlerine binaen, Ali Asanovnıñ büyük qızı Gulnaranı öpmege ve onen laf etmege imkânı oldı.
Qırım İçki rayonınıñ Ferngeym (Urojaynoye) köyü sakini Ali Asanov 2015 senesi aprel 17-de yaqalandı. Taqiqatnıñ noqta-i nazarına binaen, o, 2014 senesi fevral 26-da Qırım parlamenti binası yanında keçirilgen miting neticesinde yüz bergen kütleviy nizamsızlıq istirakçisi oldı. Belli olğanına köre, Ali Asanov, dört balanıñ babası ola, olarnıñ eñ kiçigi, babası SİZO-da bulunğan vaqıt doğdı.
